Page 1 - AM200713

Juli 13, 2020
www.awemainta.com
www.facebook.com/awemainta
noticia@awemainta.com
583-1400

BISHITA NA GRAF DI DEFUNTO DEN SANTANA

A LAGA MOTOCICLISTANAN NA PIA

DIADOMINGO mainta alrededor di 10:45am a despacha tres
unidad di Polis pa Santana Publico situa na Sabana Basora, na
Pos Chikito. Aki a bin topa cu un grupo di amigo riba scooter,
kendenan a bay bishita un defunto cu a cumpli 2 aña morto ayera.

E patruyanan policial a presenta n’e sitio debi cu e grupo tabata haci
desordo. Polis a papia cu nan y a pidi pa bandona e sitio. E grupo
di amigo a coopera cu Polis. Pero un rato despues e defensornan
di ley a presenta bek.
Aki a cuminsa pidi cada motociclista p’e respectivo papelnan
di bromer. A confisca un Hayabuza, entre otro, pa motibo cu e
papelnan no tabata na ordo.

E motociclistanan a reclama n’e sitio cu nan no tabata haciendo
desordo den santana, solamente cu a bay rindi honor na nan amigo
cu a fayece riba scooter dos aña pasa.
A elogia e prome Polisnan cu a yega y papia cu masha respet y
acorda pa nan move di e sitio. Pero a keha con e otro Polisnan cu a
yega despues a bin controla riba rijbewijs, seguro y keuringskaart
como excuus pa kita nan vehiculo for di nan.
Hopi a reclama cu esey ta nan “cos di careda” pa hiba nan pa nan
trabou pa nan por gana nan pan di cada dia. Hopi di nan a keda na pia.