Page 3 - AHATA

Ley di All Inclusive posponi cu un siman

Tuesday, 02 August 2016 20:12
Comparti

Na Parlamento a dicidi cu e reunion publico pa trata e cambionan proponi den e ley cu ta regula permit di
operacion pa hotelnan, lo cambia di diabierna 19 di augustus pa diahuebs dia 25 di augustus proximo.

Motibo di e cambio no ta conoci, aunke lo tin algun viahe di trabou di Parlamentarionan pa reunionnan di
Parlatino.

E ley proponi riba mesa awo a conta cu hopi resistencia di gremionan comercial, sindicato FTA y a haya
atencion di algun organisacion importante. Entre otro ta spera cu Banco Central por keda cla cu e
investigacion cu ta andando relaciona cu e posibel impacto cu e formato di cobransa "All Inclusive" lo por
tin riba nos industria turistico, sea e ta un impacto positivo of negativo. Te awo no tin un investigacion
haci na Aruba, segun e industria di nos isla y no uzando otro paisnan y islanan como ehempel,
specialmente unda circumstancianan ta hopi diferente.

Ta conoci cu PWC a conduci un investigacion den nomber di Aruba Tourism Authority pero te ainda ni
Ministernan, ni AHATA, ni Parlamento y tampoco prensa local no a logra haya copia di e conseho final.
Ta bon pa señala cu e organisacion di hotelnan y turismo di nos pais, AHATA a expresa na mas di un
ocasion di ta na fabor pa haci mas investigacion pasobra nan no ta kere directamente den regulacion di
mercado. Varios otro organisacion internacional a señala mesun cos y ta adverti Gobierno di retonan cu
e ley aki lo por trece cune pa nos pais.

Ultimo tabata e compania di tour, TUI, cu ta bin cu su mesun avionnan pa Aruba, ta traha cu e hotelnan
di mas grandi, tin nan mesun cruceronan, tambe a uni su mes na otronan cu a conseha Gobierno di
Aruba pa no cana e caminda di adaptacion di ley di permiso di hotel pa regula un formula asina exitoso y
creciendo den henter Caribe.

E decision final ta keda den man di miembronan di Parlamento di nos pais pa dicidi e rumbo den cual kier
hiba nos turismo. Parce cu internamente tin hopi "lobbymento" tumando luga pa presenta varios tipo di
amienda, cu lo por cambia y suavisa e cambionan proponi drasticamente y kita e poder "den un solo
man", manera cu e organisacionnan ta teme awor.