Page 1 - AM210420

April 20, 2021
www.awemainta.com
www.facebook.com/awemainta
noticia@awemainta.com
583-1400

PROGRAMA AYUDO DI CUMINDA

CRUZ CORA YEGANDO SU FIN

DESPUES di mas cu 12 luna yudando cu e
programa di cuminda n’esnan mas vulnerabel den
nos comunidad, Cruz Cora Aruba ta preparando
p’e final di e programa. For di mei 2020, Cruz Cora
a coordina e programa aki na momento cu a wak
e necesidad grandi cu a surgi durante e pandemia.
Como un organizacion mundial di disaster, Cruz
Cora ta duna un sosten temporario eficiente. Pero
no por reemplaza un structura di asistencia social
di un Gobierno. A coordina e programa aki pa mas
di 12 luna cu fondonan di Gobierno Hulandes.
Un programa di asistencia cu cuminda di Cruz
Cora normalmente ta dura algun luna. Despues
di e programa aki, Gobierno di Aruba lo bin cu
un asistencia structural pa yuda e comunidad.
Gobierno Hulandes ta trahando hunto cu Gobierno
di Aruba riba un programa di asistencia nobo.

Despues di 30 di juni, Cruz Cora Aruba ta sigui cu
su otro servicionan na comunidad: Ayudo social
cu paña; Guia; “Soup Kitchen” na San Nicolas;
Prome Auxilio durante evento; Programa pa nos
grandinan; Sosten na Hospice Atardi; Projectonan
di Inclusion y Proteccion na esnan mas vulnerable.
Cruz Cora Aruba ta sumamente satisfecho cu e
logro aki. E sostene mas cu 27.000 persona cu
un E-voucher pa haci compras. A parti mas cu
7000 pakete di cuminda y mas cu 90.000 cuminda
cayente na esnan mas vulnerabel.

Tur esaki cu sosten di varios organizacion y tur
supermercado cu a participa. Masha danki pa tur
e colaboracion! Cruz Cora Aruba ta gradici BZK,
VNOA y tur stakeholders p’e confianza y sosten
durante e ultimo 12 luna di e programa y na tur
boluntario y trahador di Cruz Cora Aruba cu a
traha dia y anochi pa haci e programa aki posibel.