Page 6 - MIN JUS

Impasse serio den Gabinete Eman II: Permanencia di Otmar Oduber den Gobierno birando
dificil

Monday, 25 July 2016 01:17

Comparti

Den fin di siman tensionnan a sigui halto den seno di Gobierno, specificamente entre e campo di e
votadonan di Minister Otmar Oduber y e demas candidatonan di e partido mas grandi di Aruba.

Ta parce cu tur esfuerso haci desde Januari cu Oduber kier a bandona Gobernacion te cu awor, di un
forma of otro no ta yudando. Su demanda pa saca Minister Sevinger, Dowers y De Meza for di partido ta
sigui riba mesa y ta bisto tambe den su forma di ataca nan den media. Ta mustra cu e Ministernan a
informa Prome Minister Eman cu awor ta basta y cu Gobierno y Partido mester hala un strepi final tras di
e problemanan interno. E tensionnan a subi den weekend ora cu Ralph Maduro, conoci publicamente
como e lider di campaña di Otmar Oduber, alabes consehero politico, amigo di cas y donjo di su ex
negoshi, a publica riba red social cu nan ta cla cu e partido nobo y a insinua cu e color lo ta blauw. Aunke
cu den pasado tur e partidonan politico di e color ey a caba na nada, toch Maduro a conseha Oduber pa
scoge e color ey pa e movecion politico nobo. Recientemente ta wordo menciona dor di su mesun
hendenan cu a hasta bay Colombia pa prepara material di promocion pa e partido, sosteni pa algun
comerciante masha conoci den comunidad, cu a traha di cerca cu e mandatario y parce a haya suficiente
"fabor" pa por sostene bek awor. Aunke cu partido AVP a opta pa mantene silencio na un principio, toch
despues a bin sali na cla cu Otmar Oduber a tuma contacto cu varios colega den partido y hasta
campañadonan prominente pidiendo pa nan sostene su partido nobo. Tur, sino mayoria a nenga y a yama
liderazgo di partido mesora pa informa di e desaroyo traicionero aki. E situacion a bay asina leu cu por lo
menos 1 Minister a bandona e "chatgroup" di Ministernan bisando cu e no kier forma parti di un grupo
unda tin traicionero di partido envolvi aden. Esey ta haci claro cu e otronan a activa tambe y ta comparti e
mesun opinion. Otmar Oduber mes ta bisando e posibel candidatonan di su movecion politico cu e fecha
cu ta anticipa pa start campaña y pa bay cu su partido nobo lo ta riba su cumpleaños, esta dia 7 di
augustus proximo. Ta conoci cu un di su problemanan mas grandi den partido ta reapertura di refineria,
pa motibo cu Minister Otmar Oduber lo a prefera pa habri un hotel na e mesun sitio. E hecho cu e impacto
economico di un refineria ta mas grandi cu esun di un hotel no ta interes'e y como tal a cuminsa un guera
frontal contra Minister Mike De Meza. E tempo aya el a laga De Meza y Eman biaha pa Hulanda pa start
un campaña den media contra e refineria y pro e hotel tras di nan lomba. Masha lihe e campaña a kibra,
ora cu habitantenan di San Nicolas a lanta para! Papiando di San Nicolas, ultimo simannan e ta
bishitando e bario masha, ta uza algun hende pa purba intimida habitantenan y purba gaña nan wowo cu
trabou of promesa, pero e ta hayando portanan cera tur caminda y ta haya tende cu San Nicolas tin un
candidato preferi caba y cu nan ta "all the way" cune. E siman nobo ta habri awor cu un reto nobo pa
Prome Minister Eman y alabes lider di partido AVP, pa balansa e demandanan di Minister Oduber banda
di e trabounan cu e demas 7 otro Ministernan ta desplega diariamente den su Gabinete sin preshon y sin
demanda. E desenlace ta inevitabel, den cual por mira cu un relacion di hopi aña di lealtad awor ta crusa
otro y tuma direccionnan separa pa motibo di interes personal y di un grupo specifico.