Page 5 - KUSTWACHT

Tatiana Eman-Mallarino: Mester duplica presupuesto di
Ministerio di Husticia

Tuesday, 04 October 2016 21:05
Comparti

“Den cuadro di crecemento di criminalidad na Aruba, Comision ProSiguridad
a wordo crea pa un grupo di ciudadanonan preocupa cu e ultimo desaroyonan negativo na nos isla”,
asina Tatiana Eman-Mallarino a duna di conoce. Meta di e comision ta pa haci un yamada na Gobierno
di Aruba pa atende cu e asunto aki y bin cu un solucion inmediatamente. “Nos pueblo ta sinti cu e
maneho di Gobierno pa combati criminalidad a faya y tin e percepcion cu hopi di e instancianan superior
ta negligente”, segun vocero di e comision.
No obstante e hecho cu partido MEP a anuncia e marcha aki desde un principio y despues a pas’e pa
comercio, e Comision ta insisti cu “Ta hopi importante pa señala cu e marcha aki no tin niun interes
politico y cu contrario na esey, nos comision ta invita miembro di tur partido, gremio, sindicato y tur
organisacion pa uni na nos causa”. E comision ta conta cu sosten di sindicatonan STA, TOPA, SCCA,
UPA, SIWA, algun comerciantenan y ta spera cu tur ciudadano por uni pa nos por frena criminalidad y e
ola di maldad na Aruba, un isla cu semper tabata conoci como un lugar hopi sigur.
E preocupacion di e comision aki ta resumi e temornan di henter nos comunidad, ya cu trankilidad na
Aruba a bay perdi. Lanta placa, keiro anochi, sali trip, haci compras y realisa otro actividadnan a bira
algo cu nos hendenan ta sinti hopi miedo pa haci. E formanan pa atraca a bira masha innovativo y ta na
cualkier caminda bo por wordo agredi. No ta solamente anochi tin episodionan di criminalidad, pero
awo hasta den dia cla.
“Nos tur sa cu Cuerpo Policial tin man yen y cu e no a wordo reforsa den 4 aña. Warda Nos Costa no a
wordo reactiva tampoco, Visibility Team a disparce; ni radar nos tin, corda helicopter”, asina Tatiana
Mallarino a duna di conoce den su declaracion, aunke cu mester bisa cu Warda nos Costa ta activo
diariamente, Visibility Team ta mas grandi cu nunca, Kustwacht tin radar y tur dia Aruba ta conta cu
patruyahe di helicopter for di Kustwacht staciona na Corsou.
Mas leu e ta bisa cu “Den e aña aki nos isla a conoce cifranan nunca antes mira pa loke ta referi kiebro,
ladronicia, joyriding, atraco, adictonan riba caya, ilegalidad y hasta asesinato. E circulacion di arma di
candela ta alarmante y castigo pa esunnan cu ta porta nan ilegalmente, no ta severo. Comision
ProSiguridad tambe ta pone enfasis cu no pasobra criminalidad a subi rond di mundo, nos mester acepta
cu na Aruba esey tambe mester bira un realidad. Nos ta convenci cu e presupuesto pa Ministerio di
Hustica mester por lo menos wordo duplica, pasobra sin siguridad no tin un desaroyo social ni
economico manera mester ta”.
Na final e comerciante cu ta maneha e tienda di paña Bennetton a conclui bisando cu “Comision
ProSiguridad ta invita henter pueblo di Aruba pa marcha cu nos pa nos haya nos siguridad bek. E marcha
nacional lo tuma luga dia 13 di October 2016 pa 4pm. E luga pa topa lo ta Post Kantoor. Ban tur uni den
un marcha nacional pa stop criminalidad awor, ta basta; nos kier biba trankil den nos cas!”