Page 40 - MIN PAUL CROES FEB 3,2015

Abogado di Solo di Pueblo ta cuestiona maneho di Minister
Paul Croes

Publication: Tuesday, 3 March 2015. Categoria: General

Den corte:

mientras cu abogado di e mandatario ta pidi rectificacion

ORANJESTAD (AAN): Den corte di prome instancia a tuma lugar un caso sumario cu Minister Paul Croes
a entama contra di e corant Solo di Pueblo, despues cu e corant a publica algun articulo den cual e
corant lo a skirbi entre otro cu e mandatario lo ta haya placa bao di mesa entre otro atravez di su
secretaria, pa aproba e asina yama ontheffing, pa cierto companianan haya permiso pa trahadornan no
di Aruba.
E corant lo a insinua cu quizas Croes ta envolvi den corupcion y pesey e mandatario a cuminza un caso
sumario pa exigi rectificacion.
E intencion tabata prome tambe pa pidi un rectificacion di parti di Jan de Ruiter pa locual e tambe a
skirbi den Solo di Pueblo, pero como cu de Ruiter a skirbi un tipo di rectificacion caba den cual el a bisa
cu e no tin prueba ainda cu minister Paul Croes ta comete corupcion, e caso a wordo dirigi solamente
contra director y propietario di e corant, esta Edmond Croes.
E mes no tabata presente na corte, pero su rumannan si tabata tey, como tambe de Ruiter.
Edmond Croes a wordo representa pa abogadonan Anthony Ruiz y Iris Wever, mientras cu Paul Croes a
wordo representa pa abogadonan Michelle Wever y Maarten Willems.
Ruiz a cuminza na bisa cu 2 di e tres articulonan pa cual Minister di Croes di labor a pidi rectificacion a
wordo skirbi pa de Ruiter, kende ta skirbi pa Solo di Pueblo pero na un manera independiente.
El a bisa tambe cu lider di e partido di oposicion a hasi diferente pregunta na e Minister di labor rond di
e acusacionnan, pero e no a contesta.
Ruiz a sigui bisa cu mayoria corant na Aruba incluyendo DIARIO, Bon Dia, Awe Mainta y Amigoe di
Aruba, ta liga na Gobierno di AVP y cu e Minister por a reacciona contra e acusacionnan usando un of
mas di e medionan aki.
Ruiz a bisa tambe cu e Minister por a uza BUVO cu ta prensa di Gobierno, pa por splica cu e no a
participa den corupcion, pero e no a hasi esaki.