Page 4 - MIN ON 29 APRIL 2016

Minister Oduber Goede meesters maken goede knechten

Thursday, 28 April 2016 18:16
Comparti

Ministerio Publico pa e di tantisimo biaha ta mustra cu no tin nada fraudulento a tuma luga bou di maneho di
Minister Otmar Oduber.
E mandatario ta indica cu pa 7 aña largo na parlamento den oposicion a wanta persecucionnan di partido MEP y
nada no a cambia. Ta mira cu cada biaha Ministerio Publico ta haya bishita dor di miembronan di e partido geel y
cada biaha ta mira cu nan intento ta envano. E minister ta menciona casonan manera esun di Jan de Ruijter den Hof
cu tres hues cu a pone cu Sr. de Ruijter mester a rectifica tur su acusacionnan e tempo ey. A mira rectificacion mester
a tuma luga di e grupo di 7, cu e mandatario ta indica cu e grupo ta fomenta pa e partido MEP, unda Sr. Dijkhoff
mester a rectifica tur e acusacionnan cu continuamente ta papia na radionan. Sr. Oduber ta bisa cu cada biaha cu
mester defende su honor, defende su principionan lo percura pa esaki wordo investiga y por wordo hiba hues tambe
pa haya e rectificacion necesario. Minister Oduber ta mustra riba e ultimo caso un biaha mas ta sali na cla cu no tin
nada fraudulento a tuma luga. Ta trata aki di e asina yama den un asina yama "Strawberry-gate" cu continuamente e
lider di e partido di MEP ta menciona cu Sr. Oduber lo tin un investigacion andando cu tin acusacionnan penal contra
su persona. Dia 22 di april 2016 Ministerio Publico a manda un carta referiendo na un "feitenonderzoek" cu tin riba
un MOU firma cu Dexacol. E resultado di e investigacion ta menciona cu Minister Otmar Oduber, y/of cualkier
personal di Ministerio, y/of DLVV Santa Rosa y/of Directie Financien, lo no tin niun indicacion di actonan
fraudulento cu a tuma luga.
Sr. Oduber ta bisa esaki ta un atentado mas di e mas di 25 pa 30 atentado di MEP pa daña nomber di su persona. No
ta mucho tempo atras cu a purba haci un atentado cu ATA ariba cifranan. "Atrobe miembronan di MEP a cana bay
Ministerio Publico manera OM no tin hopi otro casonan pa atende. Partido MEP simplemente pa nan incapacidad di
por haci nan trabou den parlamento, ta uza instancianan manera Ministerio Publico pa haci politica."
Minister Oduber ta mustra riba e hecho cu enbez nos duna Ministerio Publico e espacio pa nan por haci nan trabou
riba casonan cu di berdad mester di nan atencion y ta importante, partido MEP un biaha mas ta bay OM pa haci
politica.

E mandatario ta sigui bisa cu mientras cu Ministerio Publico ta decepciona e partido geel, a tuma nota den medionan
di comunicacion cu den seno di e propio partido MEP, e propio integrantenan di e partido si ta haci nan mes culpabel
na actonan fraudulento, corupto den nan mesun partido. Sr. Oduber ta mustra riba e hecho cu awor MEP mester saca
miembro di partido cu tur dia ta yena corant, miembro di e partido cu tin un funcion den parlamento como
consehero financiero di e fraccion di MEP den Parlamento durante e ultimo añanan, cobrando un salario di Gobierno
di Aruba, placa di pueblo di Aruba. Pa malversacion di placa di e mesun partido di MEP awe Sr. Gerick A. Croes ta
wordo saca for di e partido. Minister Oduber ta termina bisando cu tin un dicho cu ta bisa: "Goede meesters maken
goede knechten" y ta un mensahe directo pa lider di e partido MEP. Den tur e acusacionnan haci contra Minister
Oduber, el a sa di desenmascara y mustra MEP riba e hecho cu mientras nan ta punta dede riba contrincantenan
politico tin 4 ta punta bek den nan direccion. E ta referi na e record di casonan cu tin entre e miembronan di e partido
geel unda un biaha mas un otro ta sali na cla, awor pa malversacion di placa.