Page 44 - Awemainta

44 AWEMainta Diamars, 17 Mei 2016

Bon Nochi Drumi Dushi

Tanto Cuenta tabata
un exito rotundo

DIASABRA ultimo, Cas di Cultura tabata yena cu hende pa e presentacion

di 3 Cuenta di Hada, Tres storia cu a hiba e publico, chikito y grandi, den un
mundo yena cu magia y fantasia.
Cu esaki Tanto Cuenta, bou guia di Fundacion Bon Nochi Drumi Dushi, a hiba
contamento di storia na un nivel mas avansa.

Transmiti cuenta oral di adulto pa mucha ta un forma tradicional den hopi
cultura.
Hopi storia di antes ainda ta bibo den nos memoria; nan durabilidad atraves di
tempo cerca cada un di nos ta consta e importancia di nan contenido, mescos
cu nan poder di a deleita nos, desaroya nos creatividad, fantasia y siña nos
moralnan di bida.

Cuenta di Hada ta un bunita forma di duna e muchanan e oportunidad di conoce
y saborea tur e personahenan di cua nan welo- y mayornan a crece cu nan.
Cuenta di Hada den forma actua ta laga e mucha biba cu tur e personahenan
cu nan conoce atraves di storia conta.

Pa e motibo aki Tanto Cuenta a ofrece un combinacion di tres cuenta clasico
conoci cu ta haci di e contenido un momento completo y inolvidabel pa e mucha.
E publico cu tabata presente a hari y gosa di tur e aventuranan di e Soldaat pia di
Chumbo, di e astusia di e comerciantenan den E Pañanan nobo di e Emperador
y di e travesuranan di e kabouter den Cachicambito.

E elenco tras di e anochi exitoso aki ta consisti di Emeil Vijsma, cu a eherce dos
rol den dos cuenta; e kabouter y e diablito maldito, Caluda Poulina como un
cunukero y e mama di e mucha muhe pober cu despues a casa cu un rey.
Richard Dabian como e soldaat di chumbo y e soldaat di e rey, Minoushka Chin
como e bailarina cu ta namora di e soldaat di chumbo, Dientje Hassell como
e hada madrina cu ta tover y laga e pia di e soldaat di chumbo crece, Marylin
Lugay como e donceya di e emperador, Madelene Maduro y Kimberly Croes
como dos comerciante y Sherwin Jacobs como e emperador cu a haya paña nobo.
Aldric Brete a desplega dos rol den dos cuenta; uno di e minister di e emperador
y tambe como rey. Diana Marchena a hunga pa e mucha muhe pober cu despues
ta casa cu e rey, Ruben Trappenberg a hunga rol di un tata cu ta lesa pa su yiu
y e yiu tabata den persona di Rashida Huttington.
Maestra di Ceremonia pa e anochi tabata den man di Rubia Bernabela y Martica
Lugay a hunga e papel di machi Clothilda, un contado di storia. E conocido
escritor Desiree Correa a fungi como director artistico di e presentacion.

Banda di e elenco, ekipo di produccion y tur boluntario, FBNDD no por a realisa
e presentacion na Cas di Cultura sin ayudo di e patronicado y sponsornan.
Un danki di curason ta bay pa UNOCA Aruba, Elite Productions and
Entertainment, Artmando Multimedia, Flora Market, Santarosa, House of Curls
y My Trucks Rental. Boso aporte ta nifica masha hopi pa FBNDD!

Finalmente, Fundacion Bon nochi Drumi Dushi kier gradici cada un persona cu
a asisti diasabra y ta spera cu e anochi tabata uno memorabel.
Danki tambe pa sostene Fundacion Bon Nochi Drumi Dushi den su empeño pa
stimula e placer di lesamento den nos comunidad.
Keda pendiente di e pagina di Facebook pa mas actividad y presentacion di
Tanto Cuenta.