Page 5 - AHATA

Dangui Oduber (MEP): Ki dia Otmar Oduber lo contesta pueblo cuanto placa su amiguito
a strika di ATA BANK!
Monday, 25 July 2016 18:38

Comparti

Na momento cu Parlamento di Aruba manda preguntanan pa un minister, segun nos constitucion e
minister tin e deber y obligacion pa contesta parlamento di Aruba.
Otmar Oduber cada rato ta bisa cu e ta un hende integro y ta un persona hopi transparente. Den practica
lamentablemente e ta demostra lo contrario. Den luna di maart 2016 fraccion di MEP a dirigi 25 pregunta
pa minister di turismo Otmar Oduber relaciona cu contractnan cu ta wordo duna na un intimo
amigo/ruman di dje. E amiguito aki ta donjo di diferente compania di imprenta y ta donjo di e logo di
Aruba. No solamente e ta donjo di logo di pais Aruba sino e ta haya mayoria si no ta tur contract di
imprenta y mercadeo local for di ATA. Den cuadro di esaki fraccion di MEP a puntra minister Oduber pa
duna claridad cuanto placa a ser paga na e companianan di su intimo amigo/ruman. Manera ta conoci
den communidad e amiguito aki tin cantidad di compania registra riba su nomber y ta fungi como socio di
minister. E mesun companianan aki tin cantidad di contract cu ATA y tambe departamentonan di
gobierno cu ta resorta bao di Otmar Oduber. Nos a spera mas transparencia di parti Otmar Oduber. Na
momento cu bo ta nenga di contesta preguntanan di parlamento ta pasobra tin hopi cosnan di sconde.
Dikon e no kier splica pueblo cuanto miyones di florin a wordo paga na e companianan di su amiguito?
Dikon pueblo no mag di haya sa?? Dikon tin tanto scondemento di cifra? Unda transparencia a keda??
Loke pueblo kier sa ta cuanto e "socio"/intimo amigo di Otmar Oduber a strika di ATA Bank e ultimo 7
anjanan aki. ATA simplemente a bira un banco di Otmar Oduber caminda e ta dicidi con e fondonan ta
wordo aloca y kendenan ta esnan cu ta wordo privilegia y beneficia. Te ainda, despues di 4 luna ainda
Otmar Oduber NO a contesta fraccion di MEP riba e preguntanan di TUR e companianan di su intimo
amigo.
Nos tur mester para keto un rato y wak e situacion di e intimo amigo promer cu anja 2009 y wak e
situacion financiero awor y puntra di UNDA tur e abundancia di placa a bin!Si Otmar kier ta transparente,
si e kier ta integro duna parlamento tur contract cu e tin cu su intimo amiguito!!!
No solamente negoshi ta wordo haci cu fondonan di ATA sino hende hopi serca di e amiguito ta den board
di Arubus, Arutram y Aruparking! Dikon ta e mesun persona ta fungi como miembro di e board di tur e
companianan aki??
Lo ta bon pa Otmar Oduber splica pueblo tambe cua compania di imprenta ta haci e imprenta pa tur e
busnan di Arubus? Cuanto esaki ta costa pa anja? Cuanto esaki a costa e ultimo 7 anjanan aki? Otmar
Oduber lo ta dispuesto pa comparti e cifranan aki cu parlamento di Aruba y cu pueblo?
Esaki ta loke pueblo kier sa! Cuanto miyones a wordo strika for di ATA Bank, for di Arubus, for di
Aruparking, for di Arutram, for di Santa Rosa, for di AAA N.V. y for di Directie Scheepvaart! Ta logico cu
ni cuanto Otmar Oduber bula ariba cai abou en por bai ningun caminda, no por retira, no por lanta su
partido pasobra e e BANCO cu yama ATA, Otmar Oduber NO por lague pasobra e ora e FIESTA ta CABA!