Page 5 - ON JULY 29

Aeropuerto ta cla pa salida di 210 studiante pa
Hulanda
Thursday, 28 July 2016 16:16

Comparti

Aruba Airport Authority N.V. (AAA) hunto cu Departamento di Enseñansa di Aruba, Immigracion,
Douane, KLM y Insel-Air ta prepara pa diasabra awo ora cu nos studiantenan local lo biaha pa Hulanda
pa sigui cu nan estudio.

30 di juli ta e fecha cu 2 grupo di studiante lo bandona nos isla pa sigui studia na Hulanda. Ya el a bira un
tradicion caba na Aruba cu hopi famia y amistad di e studiantenan aki lo kier despidi di nan ser keri na
aeropuerto net prome cu nan subi buelo. Ta pa e motibo aki cu aeropuerto di Aruba hunto cu e otro
departamentonan concerni a prepara di adelanta pa percura pa riba e dia aki e fluho di pasahero regular
no wordo stroba. E prome grupo di 60 studiante lo biaha 11:55 am cu Insel Air pa Curacao pa eynan sigui
cu KLM pa Hulanda. E grupo di studiantenan aki mester check-in entre 8:55 am pa 10:00 am na e parti
Non-US y mester ta na gate no mas tarda cu 10:15 am pa asina saca e “groepsfoto” cu ta keda como
recuerdo di e dia importante aki. Importante ta pa informa cu solamente e studiante y 1 mayor ta permiti
pa drenta den e area di check-in. E segundo grupo di 150 studiante lo biaha 5:45 pm cu KLM pa Hulanda.
E grupo di studiantenan aki mester check-in entre 2:15 pm pa 4:00 pm na e parti Non-US. Aki tambe ta
solamente e studiante y 1 mayor ta permiti pa pasa den e area di check-in. KLM kier recorda tur studiante
cu nan por check-in online riba e website di KLM 30 ora adelanta pa asina haci e proceso mas lihe ainda.
Pa 4:15 pm di atardi tur studiante mester ta paden na gate pa e “groepsfoto”. Gerencia di AAA ta recorda
tur persona pa no staciona vehiculo den e caminda secundario dilanti aeropuerto, tur vehiculo mester
para den e parkinglot, sino e por wordo getakel.

Informacion adicional pa tur studiante ta pa corda cu cada studiante ta permiti pa biaha cu 1 maleta cu ta
pisa maximo 23 kilo y tambe 1 carry on. Pa maleta extra te cu 23 kilo lo costa $100 extra. Un Segundo
maleta extra te cu 23 kilo lo costa $200 extra. Tambe, tur studiante cu kier biaha cu un instrument
(guitar, base guitar) tene cuenta cu esakinan mester wordo bon ekipa y lo conta como ekipahe extra cu lo
mester wordo paga. Ta pidi tur studiante tambe pa corda bisti nan badge pa asina nan wordo reconosi
durante full e proceso na aeropuerto. Esaki lo yuda pa e fluho di pasahero wordo mihor coordina riba e
dia. Aeropuerto di Aruba ta spera cu tur studiante ta na tempo na aeropuerto y cu tur studiante lo sigui e
instruccionnan cu lo wordo duna na nan pa asina garantisa un bon fluho di pasahero. Pa mas informacion
tocante kico cada studiante mag di biaha cu ne of no, por tuma contacto cu KLM direct of cu
Departamento di Enseñansa di Aruba. Riba e website di aeropuerto www.airportaruba.com tambe tin e
lista di productonan cu ta prohibi pa biaha cu ne. Tur famia y amistad lo por sigui e cobertura di e dia via
e facebook page Aruba Airport pa mira potret y tambe reportahe LIVE na momento cu studiantenan ta na
gate net prome cu nan subi avion. AAA ta desea tur studiante un felis biahe y hopi exito cu nan reto nobo!