Page 6 - CHOPHOUSE FLIP 11 JULY,2016

A celebra apertura di e concepto nobo "The Chophouse by
Manchebo"

Sunday, 10 July 2016 14:28
Comparti

Den cuadro di e preparacionnan pa celebra nan di 50 aniversario, Manchebo Beach. Resort
orguyosamente a celebra diaranson ultimo apertura di su restaurant nobo, "The Chophouse at

Manchebo".
E restaurant ta situa unda antes tabata The French Steakhouse, cu a bira masha popular e ultimo 40

añanan di su existencia. A renoba e luga, rediseñ'e, a introduci menu nobo y awor ta cla pa sirbi
huespednan platonan di calidad halto den un ambiente unico, formando un experencia culinario sin

igual.

"Nos ta sigui desaroya, sigui inverti y sigui halsa nos producto na nos huespednan y na nos localnan",
asina Edgar Roelofs, Gerente General di Manchebo Beach. Resort & SPA a bisa den su discurso. E
invitadonan a varia entre ehecutivonan di AHATA, Aruba Gastronomic Association, Aruba Timeshare
Association, operadornan di tours, chefnan ehecutivo di otro restaurantnan y miembro di Parlamento
di nos pais.
E trabou di renobacion y pa rehubenece e propiedad tabata den man di nan "in-house renovation
team" encabesa pa Rolly Melevo, cu a conta cu asistencia di Richard Ferrero y Max Nunez.
Ta bon pa enfatisa cu e raisnan di loke antes tabata The French Steakhouse ta data for di tempo di Talk
of the Town Restaurant caba, un di e prome restaurantnan di "fine dining" den su tempo, un otro
propiedad di defunto Ike Cohen.
E ekipo di cokinan den e cushina na "The Chophouse by Manchebo" ta traha bou guia y supervision di e
"Executive Chef" Ever y su asistentnan Willy y Erick, mientras cu e servicio mes ta conta cu blanco,
Joraine, Harold y Norlene. Den Omakase Sushi Bar nan ta conta cu Mylene Lapined como "sushi-chef",
cu ta pas perfectamente den e concepto di "The Chophouse".
Algun piloto di KLM a cuminsa construccion di Manchebo Resort na aña 1964 y a logra habri e hotel na
December 1966. Pero apenas algun aña despues, na aña 1970, nan a dicidi di bende cu Ike Cohen,
kende a percura pa desaroya e propiedad exitosamente. E ultimo añanan a inverti hopi den su
mantencion y a haci'e un hotel di 4 strea di 72 camber, cu 140 empleado cu ta traha diariamente cu
hopi dedicacion pa brinda un servicio asina special, cu ta percura pa huespednan keda bin tur aña
atrobe den e mesun hotel.