Page 8 - MIN SOC

Parlamentario Desiree de Sousa Croes: E diferencia entre “samenlevingscontract”,
“geregistreerd partnerschap” y “openstelling huwelijk”
Monday, 04 July 2016 19:33

Comparti

Den e diananaki e discucion a cuminsa riba un posibel cambio den ley unda lo por introduci e, na
Hulandes yama 'Geregistreerd Partnerschap' cu na Papiamento por wordo traduci como “union civil” of
un registracion huridico di pareha.

Parce cu pueblo falta basta informacion kico un union civil ta encera y kico esaki por nifica pa Aruba. Cu e
articulo aki, mi kier splika e diferencia entre un contrato di convivencia, un union civil y un matrimonio
igualitario.

Aruba conoce di basta aña caba un “samenlevingscontract” unda parehanan straight of gay por regla nan
relacion na notario. Den un contrato di convivencia, por regla cual bien ta di ken, p.e.esun ta doño di e
cama y e otro di e flatscreen. Varios pareha homosexual cu no tin otro manera pa regla nan asuntonan
huridico, ta scoge pa regla por lo menos e minimo aki den un contrato di convivencia. Ta ovio cu un
contrato di convivencia no ta brinda suficiente siguridad huridico pa en pareha.

Un union civil contrario na un contrato di convivencia, ta regla tur asunto huridico pa e pareha. Tur loke
ta bienes, loke ta derechonan, y loke ta obligacionnan di e pareha lo keda acorda den presencia di un
notario. Esaki lo trece cu ne - den esencia- no lo tin diferencia di consecuencia entre un matrimonio y un
union civil. Solamente cu esaki no lo pasa na edificio di Censo, sino na oficina di un notario. Na paisnan
cu tin e posiblidad pa regla un union civil entre pareha, parehanan ta celebra nan union cerca e notario
den presencia di famia y amigo. Tanto parehanan straight, como parehanan homosexual por bin na
remarke pa cera un union civil.

Matrimonio igualitario, of “openstellinghuwelijk”, ta nifica cu no lo tin restriccion di sexo pa contrae
matrimonio, pues no ta homber cu muher so por casa, pero muher cu muher y homber cu homber tambe.
Varios pais na mundo cu ta hopi Catholico y/of Christian e.o. Mexico, Argentina y Spaña a habri e
institucion di matrimonio y haci’e igual pa straight y gay.

Awor aki naParlamento di Aruba, mi tin un amienda (un peticion di cambio di ley) pendiente pa introduci
union civil den nos codigo civil. Solamente cu un mayoria di minimo11 Parlamentario por haci posibel cu
union civil por bira posibel na Aruba tambe. E ta un derecho humano basico.