Page 37 - BANK AUG 9

ATV den “High Definition” pa celebra su di 20 aniversario

Monday, 08 August 2016 18:06
Comparti

Den e espirito di recorda con ATV a lansa na 1996 den señal di prueba durante Weganan Olimpico na
1996 di Atlanta.
ATV a cuminsa na re-inventa su mes cu un team hoben den apenas algun siman a logra lansa e señal bek
di ATV e biaha aki for di “Caya Grandi” cu e prome transmision e ‘Ceremonia di Apertura’ di Weganan
Olimpico na Rio. Diabierna ultimo ATV hunto cu Aruba Bank a duna inicio na un cobertura amplio di
mas cu 17 dia largo di transmision continuo di NBC cu presencia local den su studionan den Caya Grandi
den “High Definition”.
Cadochi Kock y Ichelle Simon a habri e cobertura di e Ceremonia di Apertura. Durante fin di siman a
pasa algun competencia di atletanan local na Rio cuminsa cu Jayme Mata den Judo y Mikel Schreuders
den Natacion. Lo sigui transmiti e desempeño di nos atletanan durante transcurso di siman.
ATV ta den proceso intensivo di re-inventa y restructura su mes, ta haciendo lo maximo posibel pa
cuminsa cu Noticia Awenochi bek pa e dianan despues di Weganan Olimpico. Programacion manera
Brindis y otronan ta bek den nan mesun orario di custumber y tambe den calidad “High Definition”
Un señal completamente digital riba Canal 15 y exclusivamente den High Definition riba 315 di e sistema
di SETAR N.V. Cable Services pa e temporada di Weganan Olimpico. Tecniconan ta trahando duro pa
lanta e señal riba “Over the Air” bek, esta Canal 8 den e frecuencia VHF.
ATV a cuminsa cu su transmisionnan oficial dia 30 di september 1996 y desde e tempo ey a sa di haci un
cambio grandi den television riba nos isla. Na varios ocasion, pa hopi aña consecutivo ATV a gana
premio como television di aña y specialmente presentando e noticia cu mas sintonia nacional. ATV ta
conoci pa su caranan cu diariamente ta presenta e noticianan mas importante di dia. Caranan di
experiencia y cu na un forma profesional ta tene televidentenan bon informa.