Page 12 - MIN JUS 11 MAY 2016

Hof a confirma castigo di 18 aña di prison pa Baba
Ras

Publication: Tuesday, 10 May 2016. Categoria: Judicial

Nan ta hay’e culpable di asesinato di Brete na Tanki Leendert

C

ORANJESTAD (AAN): Ayera merdia 2’or, Hof di Corte Superior a dicta sentencia na Curacao di e caso di apelacion di
N.Ras (Baba).
Ta asina cu Ras a apela e sentencia di Corte den Promer Instancia cu a hay’e culpable di asesinato di Brete na Tanki
Leendert riba 30 di Juni 2013 y intento di mata di e homber P., kende a sufri un tiro den pia.

DIARIO a papia cu e abogado di Ras, mr. Mohamed, kende a bisa cu apesar cu Hof ta dun’e razon cu e declaracion
di e dos testigonan principal ta contradictorio, toch nan no ta honra su peticion pa no kere e declaracionnan aki y
declara su cliente Ras liber.

Hof a bisa cu aunke e declaracionnan riba cierto puntonan no ta cuadra cu otro, toch ta haya cu tin motibo pa
kere esakinan y pesey ta haya Ras culpable di intencionalmente a asesina Brete.

Hof tambe a exclui e scenario cu Ras lo por ta complice.
EVALUACION DI HOF:
Hof ta haya cu a keda legalmente proba cu Ras, intencionalmente y premedita riba 30 di Juni 2013 a tira Brete
den nek cu consecuencia cu el a muri. Tambe cu riba e mesun fecha ey, intencionalmente y premedita a pura mata
P. pero no a logra. E bala a alcanza su pia.
Hof ta bisa cu e ta rechaza e ponencia di abogado mr. Mohamed cu mester declara Ras liber di e acusacion di
complice di asesinato, basa riba declaracion di e testigonan A. y L. E abogado a mustra cu e dos testigonan aki a
gaña riba Ras.
Hof a mustra cu riba 30 di Juni 2013 den oranan di marduga, dos miembro di Recherche a scucha Ras expresa na
nan: “Awor nan a mata Edison. Boso lo bay detene mi awe pasobra ami mes ta bay regla e asunto aki”.
Na opinion di Hof, e anochi di 30 di Juni 2013, e acusado Ras hunto cu un otro a bay bisti na preto riba un
brommer y a core bay Tanki Leendert caminda Ras a los tiro riba un grupo di persona cu ta forma parti di e gang di
Tanki Leendert.
Despues di e tiramento, nan a bay na cas di e complice A.V. caminda A.V. a kima e pañanan. Algun ora despues di e
tiramento, A.V. y Ras a worde deteni na e cas di A.V.
KERE TESTIGONAN:
Hof ta bisa cu enberdad e testigonan A. y L. dilanti Hues Comisario a duna declaracion diferente, pero Hof no ta
haya cu a keda proba cu loke A. y L. a declara na Polis no ta berdad. Na opinion di Hof, e hecho cu e declaracionnan
no tur caminda ta mesun cos, no ta haci cu nan no ta confiabel.
YAMADA DI E TATA Y TANTA:
Hof a mustra tambe cu for di declaracion di e complice A.V. y e tata di Ras, por conclui cu e acusado Ras tabata
gran parti di e dia cu e tiramento a tuma lugar, cu e brommer di A.V.