Page 5 - MIN JUS 11 MAY 2016

Minister mr. Drs. Arthur Dowers Crimen mas pisa ta rekeri
tambe un team di aresto mas fuerte

Tuesday, 10 May 2016 18:54
Tweet
Comparti

Cuerpo Policial Aruba ta conta cu un grupo mas di Polisnan elite specialisa pa reenforsa e Team di Aresto.

E grupo di Polisnan recientemente a completa un curso intensivo cu a inclui tur e ultimo “updates” esencial pa
“Arrestatie Team” ofreci na Scol pa Polis Edgar J. “Watty” Vos. E curso a conta cu sosten di Ministernan di Husticia
di Reino Hulandes y cu participantenan for di Corsou, Boneiro, Sint Maarten y Aruba.

E grupo di Polis specialisa ta reenforsa Cuerpo Policial den e parti di aresto di sospechosonan cu ta crea un risico pa
comunidad, asina Minister di Husticia mr. Drs. Arthur Dowers a enfatisa. E mandatario a splica cu no solamente na
Aruba, pero mundialmente a constata cierto risiconan creciente, incluyendo e presencia di arma di candela,
atentadonan terorista y hopi mas. “Pa por atende cu e gruponan aki bo mester tin teamnan di Polis specialisa,” el a
agrega.

Tin diferente factor cu ta encurasha hobennan pa drenta gruponan dedica na crimen, entre otro uzo di droga y falta di
famia of un sistema di sosten cu ta brind’e e guia necesario pa e keda riba e caminda corecto. Comunidad no por sigui
bira victima di e gruponan aki, pues mester di teamnan pa reacciona riba nan y contesta nan pa por logra contene y
stop nan di comete maldad.

Ta facil pa papia ora cu e persona ta sinta na banda, e titular di husticia a bisa, referiendo na politiconan di oposicion.
Loke hopi di nan ta lubida ta cu ta rekeri vision, preparacion y accion pa logra combati e situacionnan no desea.
“Vision, preparacion y accion; tur esey nos tin”, Minister Dowers a bisa enfaticamente “y esaki bo ta mira tambe den
practica, den e resultadonan”. El a bisa cu a bira tempo awo si pa oposicion stop di aplaudi y promove ora cu
crimennan tuma luga pa medio di nan expresionnan. Ta tempo pa stop di sostene maldad y realisa cu husticia no ta
drumi, no ta sinta y lo sigui den nan afan pa persigui criminalnan.