Page 4 - DESPA 6 MAY, 2016

DESPA A topa ciudadanonan mas consciente y menos
criadero

Thursday, 05 May 2016 16:08
Comparti

Recientemente a yega e 9 simannan di “swipe actie” teni pa e Departamento di Gele Koorts en Muskietenbestrijding
(GKMB), cu refuerso di tanto DOW como Serlimar, unda a bishita varios cas den diferente bario rond di Aruba, pa
combati e sangura Aedes Aegypti, cu ta transmiti Dengue, Zika y Chikungunya.

Clayton Croes di G.K.M.B y Beleidsmedewerker di Directie Volksgezondheid, a comenta cu diabierna ultimo nan a
bishita e ultimo adresnan den e bario di San Nicolas. Manera ya menciona, 9 siman pasa, a cuminsa cu e accion aki
den Noord y a finalisa na e otro punta di Aruba, esta na San Nicolas.

Loke ta haciendo tambe ta repasando e adresnan cu a ripara cu durante swipe actie merece un bishita mas den e
casonan cu a haya advertencia. Por bisa cu e di 9 siman ta uzando pa bishita adresnan di nobo y bolbe hala atencion
di e ciudadanonan pa sigui demanda cooperacion di pueblo, algo hopi necesario pa por controla y evita Chikunguya,
Dengue y Zika riba nos isla.

Ta nota un cambio positivo si, segun Clayton Croes. Esaki ta riba hopi area, sigur riba nos isla cu ciudadanonan ta
birando mas consciente di enfermedadnan contagioso cu ta relata na sangura esta Dengue, Chikungunya y Zika. Por
lo general, salubridad den su totalidad, ta nota cu ta comiendo mas saludabel, hendenan ta moviendo, ta mirando un
cambio den pensamento, un cierto grado di conscientisacion cu ta bisa cu pueblo tin atencion sigur pa salud y pa
medio ambiente. Na e mesun momento ta nota mas interes pa preveni criadero y asina limita posibilidad di transmiti
Dengue, Chikingunya y Zika.

E accion aki a cuminsa cu un promedio di 1000 cas pa siman, cual ta un cantidad hopi grandi, specialmente si
compara cuanto GKMB su so ta haci y a ripara cu e ultimo 7 simannan e tabata bayendo consistente di 1500 cas. El a
subi cu 500 cas pa loke ta controlnan pa siman. Den esaki por bisa cu den e mesun cantidad di criaderonan cu ta haya
pa siman, cual ta un promedio di 50, na final el a keda riba 60. E cantidad di criadero a subi, mirando cu e cantidad
di casnan controla tambe a subi. Por bisa cu ta cantidadnan, mirando e cantidad di casnan cu a wordo controla, ta un
cifra relativamente abao.

Tambe ta bon pa bisa cu esakinan ta casnan registra na GKMB, ta documenta y hinca nan den database, ora tin tipo
di accionnan asina atrobe, pa bolbe bishita e casnan aki, pa tin un bon bista unda nan ta situa pa duna extra atencion
si en caso cu tin problema cu enfermedadnan cu ta relata cu sangura riba nos isla.

Riba e ultimo dia di swipe actie a bay hopi bon. Den San Nicolas, por a nota cu asina cu bishita e casnan, e
habitantenan ta bira mas consciente. Nan mes ta splica y ta conta cu a haya dengue, zika, den pasado y nan no kier
hay’e atrobe. Asina cooperacion di comunidad, tiki-tiki nan ta haya e mensahe. A pesar cu a parti folder, flyer, sticker,
formulario, conscientisa comunidad, informa y educa nan. Ta hopi importante pa nan ta na altura y yuda GKMB te
unda por.

E proyecto aki den su totalidad, GKMB y Departamento di Salubridad Publico ta masha contento ta gradici tur
departamento cu a reforsa e esfuersonan.