Page 5 - LOTTO

Minister Arthur Dowers: Merca ta reconoce esfuerso di
Aruba den e lucha contra criminalidad

Sunday, 05 June 2016 21:01
Comparti

Siman pasa, Minister di Husticia, mr. Drs. Arthur Dowers, compaña cu top di husticia di Aruba, a firma
un Memorandum of Understanding (MoU) cu Departamento di Husticia di Merca. Esaki no tabata un
acuerdo cu ta aplicabel solamente pa Aruba, sino tambe pa e otro islanan den Caribe Hulandes. E ta
encera mas cooperacion den e lucha contra crimen organisa y terorismo internacional den e teritorionan
di Caribe Hulandes.
E documento ta enfoca riba mas cooperacion y reenforsa aplicacion di ley y e sistema di husticia penal
den e partinan Caribense di Reino Hulandes. E convenio ta resultado di e bon relacion y cooperacion
continuo cu ta existi entre e diferente partnernan y cu tur ta mira un beneficio den traha ainda mas di
cerca hunto riba e tereno menciona.
E MoU firma siman pasa na Hulanda entre e Ministernan di Husticia di Hulanda, di Aruba, di Corsou y di
Sint Maarten hunto cu e “Attorney General” di Merca, esta Loretta Lynch, ta reconoce cu e islanan tin un
posicion geografico den region di Caribe cu ta haci nan vulnerabel y e tamaño di e islanan por ta causa
di retonan pa cu e lucha contra di crimen organisa y terorismo internacional.
Den e acuerdo a acorda cu lo stimula actividadnan conhunto, mas intercambio di informacion pa cu
investigacionnan criminal y mantencion di orden y siguridad publico, fortificacion di cooperacion mutuo
pa cu e tereno forensico y organisacion di e sistema di husticia penal.