Page 20 - MIN ON

Studiantenan na Enschede sumamente contento cu e
atencion personal di Minister Yrausquin pa cu nan situacion

Tuesday, 23 May 2017 11:36
Comparti

Casi mita di e grupo di studiante cu ta studiando na Enschede, Deventer y Zwolle a mustra un interes
grandi pa topa cu Minister Plenipotenciario Juan David Yrausquin. E studiantenan a aprecia e manera
habri y personal cu minister Yrausquin ta combersa cu nan riba nan estudio y nan bida como studiante
na Hulanda.

Hopi punto a bin dilante durante e combersacionnan cu minister Yrausquin a hiba na cada mesa cu e
studiantenan. E studiantenan a tuma nan tempo pa hiba un dialogo constructivo cu Minister Yrausquin
pa asina e mandatario por haya mas dato posibel pa haci un analisis di e situacion real cu ta biba bou di e
studiantenan. Asina e por bin cu un plan di accion pa segura cu e studiantenan ta termina nan estudio cu
exito. Esaki ta un punto cardinal pa minister Yrausquin den su maneho pa brinda mas sosten na nos
studiantenan. Un punto cu a resalta durante di e encuentro ta cu e grupo di studiante ta hopi close cu
otro. Esaki ta debi cu e grupo ta chikito, pero tambe cu e lasonan entre e studiantenan y e miembronan di
e Plaatselijke Opvangcommissie (POC) ta bastante estrecho. Hopi studiante a duna di conoce cu nan a
wordo yuda hopi bon mes pa POC y tambe cu semper cu nan tin un pregunta nan por acerca cualkier
miembro di e POC pa contesta of asistencia.

Sigur por bisa cu esaki ta bon ehempel con studiantenan entre nan ta yuda otro. Manera tabata e caso na
e otro encuentronan algun studiante a bai live via di Facebook pa conta riba nan experencia como
studiante na Hulanda y special tocante di Enschede, Deventer of Zwolle. Hopi tips a keda duna na e
muchanan cu ta preparando pa e aña aki bin Hulanda, manera con pa prepara bo mes mas mihor posibel
riba un estudio na Hulanda of con pa inscribi bo mes pa tin e sigurancia pa haya un camber na tempo. Na
final e studiantenan a bai cas cu un satisfaccion grandi y cu e initiativa di e minister pa cu e anochi aki ta
uno hopi positivo mes y tur tabata agradicido na e mandatario pa e invitacion.

Comentarionan (0)