Page 4 - KAPIDARAAN
P. 4
"Nini urut dululah. Aluh engkeng ujar urang lah. Awak bengkeng putih mungkal,
rambut ikal matanya galak. Pantas ae diketujui urang, lah." Diambilnya galuh dari
asuhan ulun. Dipusutinya awak Galuh lawan minyak sarai nang dicampur himbudi.
Jingkar ae Galuh manangis.
"Cup..cup... nyaman kaina awak pian, Cu’ ai. Kada sakit pang, satumat haja nini
maurutlah" Garunum nini Mamanderi Galuh nang besisigan.
"Kanapa Ni anak ulun, kana ampun urangkah, Ni?." Ulun kada sabar handak
mandangar langsung dari nini Atul. Asa kada parcaya jua ulun nang dipandirakan
acil Dayah tadi.
"Kada, baik aja. Anak ikam ni kadada tasalahu pang Nak ai. Pina digayai lawan
urang subalah banar ai. Ingatlah sabalumnya ikam bawa kamana?."
"O..Iyakah, Ni. Samalam ulun bawai ka pahumaan parak magrib, Ni ai. Mancari’i
Abahnya kada sing bulikan. Maka handak tulakan wadah julak, mehaul julak bini, jar.
Bisa ditagur urang di sanalah, Ni."
"
"Nah am, bisa ai datang situ, Nak ai." Ditilantangakan si Galuh di atas tikar purun
lawan bantal bakambang habang anum. Nini maambil bakul nang tagantung di
tawing rumah. Isinya ada janar, kapur sirih lawan paparudan.
"Nini pidarailah cu’ai, mudahan lakas ampihan. Nini tandaiakan cucu nini nang
bungas langkar nginih." Diparutakan ai janar di papiringan halus, dikacak lawan
kapur.
"Tanda anak ikam kapidaraan, janar nginih habang banar. Nah liati, habang kalo
Nak." Nini Atul menampaiakan bakas janar di batis kaning Galuh. Dikasainya lawan
Nini talapak batis, buku-buku batis, siku, dahi, balakang talinga lawan balikat si
Galuh.
