Page 14 - ARUBA AIRLINES
P. 14
Cu e buelonan adicional pa Aruba na nan network di buelo existente, e aerolinea nacional
di St. Maarten Winair lo conecta Caribe Hulandes completo, sigurando biahamento sin
problema y cumpliendo cu expectativanan di e publico biahero. E expansion di e network
existente lo sirbi e necesidadnan di e biaheronan durante e periodo druk di zomer.
Winair lo bula pa Aruba for di St. Maarten via Curacao (HUB) riba dialuna, diahuebs y
diasabra, y lo bula for di Aruba pa St. Maarten via Curacao riba diamars, diabierna y
diadomingo. E servicionan aki lo ta disponibel pa publico usando e avionnan ATR 42
500/600 cu capacidad di 48 pasahero.
“Buelonan nobo pa nos destinacion ta semper bonbini na nos aeropuerto. Nos ta
constantemente buscando mas opcion pa nos pasaheronan. E area di Caribe, specialmente
e area di Caribe Hulandes ta un area hopi importante pa e mercado local y nos ta
convenci cu e servicio nobo di Winair lo acomoda e demanda pa St. Maarten y e resto di
islanan serca,” asina AAA su Air Service Development Manager Sra. Jo-Anne Arends a
bisa.