Page 122 - KPA

Hombernan sospechoso rond di Excelsior Casino deteni a la
pelicula banda di High Rise Hotel

Tuesday, 04 July 2017 20:28
1

Comparti

Den oranan di atardi laat, movecion sospechoso di tres homber den entrada di Exclesior Casino na
Holliday Inn, a capta atencion di un ciudadano.
Ta trata di un dama cu a mira con e tres hombernan tabata actua straño y pesey mes a yama Polis
mesora. El a duna tur detaye necesario y hasta number di e auto. Segun e dama cu a yama tabata avisa
Polis cu tin un di e hombernan cu algo cu parce un arma di candela. A pensa mesora cu ta un atraco.
Despues e mesun yamada ta bisa central di Polis cu dos di e hombernan a drenta casino y uno a keda na e
auto pafo na entrada. Polisnan a bay cu varios unidad pa e sitio. E prome unidad cu a yega a tende cu e
auto a caba di bay. Otro unidadnan cu tabata cerca a topa cu e Yaris moviendo algun 100 meter leu di e
casino. A blokia e auto completo di dilanti y patras y cu arma den man a baha tur tres ocupante pone nan
plat na tera. A cuminsa un buskeda den e auto. Den bahul a haya algun maleta. E personanan den e auto
tabata hendenan di Corsow mirando nan accento. Nan no a topa cu e arma den auto ora a listra. E
cantidad di hende local y turista cu a mira e accion di Polis tabata bastante. Despues di detene tur tres
persona a bay cu nan warda den tres auto separa. E auto tambe a wordo hiba warda di Polis. Na warda a
keda di bay listra cu mas profundidad. A pidi presencia di e cacho specializa di Polis pa tambe bin duna
un man. Segun por a saca afo di esnan plat na tera deteni, berdad nan a bay na e casino pero pa chek un
renchi cu nan lo a perde. Un di nan ta di prensa na Corsow y a bin pa e concierto. E momento ey dimes
ningun Polis conocenan. Parce cu despues di pasa e proceso na warda a laga nan bek den libertad. Asina
mes nan a pasa den un experiencia cu lo keda graba den nan cabez pa motibo di movecion sospechoso
den porta di casino.