Page 5 - YMCA MARCH 7,2016

Exposicion di arte diamars otro siman na YMCA San Nicolas

Sunday, 06 March 2016 16:11
Comparti

Dia 15 di maart nos muchanan na YMCA San Nicolas lo tin un “Art Expo”, den cual lo presenta obranan
di arte cu ta duna homenahe na nos dushi isla y su bandera.

Durante e exposicion nan lo tin un show chikito di canto di nos himno y tambe lo presenta poesia skirbi
specialmente pa e ocasion aki.

E muchanan di kleuter te cu MAVO ta den pleno preparacion tur e dianan aki cu nan obranan di man. Ta
invita tur mayor, famia di nos muchanan y publico en general pa presencia e trabao di nos hobennan
diamars 15 di maart entre 6.30pm y 7.30pm na YMCA San Nicolas.

Di e forma aki por mira claramente cu e lidernan di YMCA situa na Dakota como tambe na na San
Nicolas, ta traha duro cu muchanan pa organisa actividadnan util den nan tempo liber. No solamente
huiswerk, pero tambe movecion, deporte y obranan di man. E aña aki, relaciona cu celebracion di 30 aña
di nos Status Aparte y 40 aña di nos Bandera, ta dedicando extra atencion na e celebracion y ta prepara e
muchanan pa un celebracion special.

Young Men's Christian Association (YMCA) ta funda dia 6 di juni 1844 dor di George Williams na
London, Inglatera. Su oficina principal ta na Geneve, na Suisa. Mas di 57 miyon hende ta beneficia di e
asociacion estableci den 125 pais rond mundo. E lema principal di e organisacion internacional ta
empodera hendenan hoben.

Bob Steele a funda YMCA Aruba 57 aña pasa dor di e necesidad pa bin cu un luga pa hobennan pa evita
cu nan lo ta riba caya. Sin fondo disponibel, cu e lema “Without a cent, but with hope and prayer”, un
grupo di persona a cuminsa cu e organisacion cual a haya apoyo di entre otro Lago Oil and Transport Co
y Rotary Club pa asina na maart 1958 YMCA por a logra inaugura su prome edificio na Aruba.

YMCA tin como meta pa crea personanan util y habil den nos comunidad pa medio di brinda guia y
motivacion, pa asina nan ta un influencia positivo ariba nan contemporaneonan. YMCA ta ofrece
diferente actividadnan manera campamento pa mucha, campamento pa hoben, recreacion deportivo
manera p.e. volleyball y basketball y otro deporte, como tambe eventonan social. YMCA a cuminsa cu e
prome “tra’i merdia”, yama Y’s Care (YMCA Care) cu a cuminsa na Aruba 24 aña pasa cu un programa di
asistencia cu huiswerk y recreo.