Page 6 - FUND MUSEO HIST FORT ZOUTMAN

Fort Zoutman lo ta anfitrion di evento "Poëta di Patria"

Tuesday, 08 March 2016 15:04
Comparti

Museo Historico ta sinti su mes masha honra pa por anuncia cu, hunto cu Comision Celebracion Dianan
Nacional, di departamento di Cultura y cu empuhe di Ministerio di Cultura, pa forma parti di e
celebracion di 30 aña di nos Status Aparte y 40 aña di nos Himno y Bandera, pa por ta anfitrion di e
evento di poesia yama "Poëta di Patria.

Esaki ta un competencia den cual ta haci yamada na tur poëta di Aruba pa skirbi nan poesia dedica na
nos patrimonio. E tema di e aña aki ta "Un aventura cultural". Esaki den cuadro di e hecho cu nos isla ta
multicultural, pues nos ta masha rico na historia. Museo Historico ta convenci cu e tema aki sin duda lo
pusha e mente creativo un tiki mas. "Papiando di tema, si Bo ta bay skirbi un poesia di e patrimonio di
Aruba, no pensa solamente riba Status Aparte of Himno y Bandera", asina Joase-Ann van der Biest,
Manager di Museo Historico a splica. "Por pensa riba Aruba completo, manera riba nos cultura, historia,
herencia, flora, fauna, musica, nos ta asina rico na tradicionnan cu ta forma nos cu Bo poema por ta rico
na informacion y inspiracion tambe". Fundacion Lanta Papiamento lo cualifica e poemanan pa asina saca
e miho "Poëta di Patria". Mester tene cuenta cu reglanan di participacion, cu ta minimo 4 y maximo 7
strofa, cada strofa mester consisti di 4 liña, mester rima, tipico mester ta patrimonio di Aruba, e poëta
por participa te cu 3 poema y experto di poemanan mas largo por participa pero mester tene cuenta cu te
cu 17 strofa por cualifica.

Ta pidi tur interesado pa entrega nan poema prome cu dia 11 di maart na Departamento di Cultura of na
Fort Zoutman. Tambe por mande via e-mail na: fundacion.lanta.papiamento@gmail.com of na
poetadipatria@gmail.com. Setar como patrocinado di e evento lo entrega un premio special na un tema
special den e evento, cu ta "Creando conexion". Den e segmento ey mester por enfoca riba e 30 añanan di
Setar como nos compania nacional di telecomunicacion y e desaroyonan cu telecomunicacion tabatin den
e ultimo decadanan. E anochi final pa eligi e "Poëta di Patria" lo ta un anochi di gala riba diamars 14 di
maart 2016 den Fort Zoutman cuminsando for di 6:00pm. Ta invita un y tur pa ta presente na e evento
aki, den cual e miho poetanan di Aruba lo sa di inspira y presenta nan poemanan pa dedica specialmente
na nos celebracion special e aña aki, en conexion cu 30 aña di nos Status Aparte y 40 aña di nos Himno y
nos Bandera.

http://www.24ora.com/local-mainmenu-5/106135-fort-zoutman-lo-ta-anfitrion-di-evento-qpoeta-di-
patriaq