Page 70 - MIN VOS JULY 10

Bus di Salud y campaña pa biba saludabel di Gobierno ta
bay man den man cu otro

Publication: Friday, 10 July 2015. Categoria: General

Prome Minister Eman:

ORANJESTAD (AAN): Un programa importante cu enfoke riba salud a wordo introduci bou
di Gabinete Mike Eman I y ainda continua dunando su frutonan bou di e di dos gobernacion di e
signatura aki, ta Bus di Salud. E ta un vision cu enfoke pa hiba e prome linea di cuido mas cerca
di e pashent.

Esaki, hunto cu otro iniciativanan pa incentiva miho salud den nos pueblo, manera Linear Park y
iniciativanan pa haci mas ehercicio, ta forma un manera pa structuralmente drecha nos sistema di
salud y na e mesun momento crea conscientisacion pa un miho calidad di bida pa ciudadanonan
di Aruba.

Bus di Salud ta bishita diferente compania of instancianan durante henter aña y riba diahuebs e ta
forma parti di e Accion di Bario hunto cu Prome Minister Mike Eman.

E ta un forma “pa reforsa e prome linea di cuido di dokternan di cas y ta encurasha esnan cu no
por sali bay leu for di cas mas,” Eman a bisa diahuebs ultimo for di Mabon unda cu e Bus di
Salud tabata na e compleho di casnan di FCCA.

Na e compleho di cas di FCCA tin basta hende grandi ta biba y “por a sinti un aprecio grandi pa
e presencia di Bus di Salud”, unda cu e dokter encarga ta controla sucu y presion, pero ta evalua
tur sintomanan di un malesa cu por wordo detecta den un consulta primario.

Prome Minister Eman den e bus di salud a mira e procedura cu ta wordo hiba ora di atende cu e
clientenan y por a constata cu algun ta wordo conseha pa bishita dokter di cas pa haci un
evaluacion mas profundo riba cierto areanan. E Bus di Salud ta principalmente importante pa e
grupo di hende grandi cu no ta por sali di cas mas pa bay leu bishita un dokter. Pero tambe e ta
yuda pa e personanan cu ta sinti un drempel pa bay nan dokter di cas. Cu e Bus di Salud nan ta
acudi cerca un dokter den un ambiente cerca di cas y hunto cu hendenan conoci. “Di e forma aki
ta yega mas cerca posibel di e habitantenan cu e Bus di Salud”.