Page 18 - DESPA

Prome Minister Mike Eman ricibi cu brasa habri den bario di
Ponton

Thursday, 09 March 2017 21:40
Comparti

Diahuebs mainta Prome Minister Mike Eman hunto cu funcionarionan di Oficina di City Inspector,
Serlimar, GKMB y Team BoBario a cana den Ponton.

Habitantenan cu un sonrisa grandi riba nan cara a yama e mandatario bonbini den e diferente casnan cu
a wordo bishita durante e caminata di dos ora.

Prome Minister Eman a informa habitantenan di e parti paden di Ponton cu diahuebs anochi (ayera) a
cuminsa pone iluminacion den e area cu a biba den scuridad pa hopi aña. "Danki MinPres. Hopi danki.
Nos ta contento cu un mandatario ta yega nos cas cu bon noticia," Sra. Mena Tromp a expresa na Prome
Minister.

Funcionarionan tabata compaña e mandatario principalmente pasobra mayoria di e peticionnan cu ta
bini di e habitantenan tabata pa SERLIMAR recoge sushi grandi cu ta keda para pafo di nan cas, door cu
no tin vehiculo pa transporta esaki pa dump, of pa deshaci di e dumpnan ilegal cu a wordo crea den
bario. Den e Accion di Bario na Ponton, Prome Minister Eman a logra drenta mas o menos 20 cas, unda
cu el a papia cu famianan riba e iluminacion cu ta bay cuminsa pone den e bario, pero tambe con e
departamentonan di Gobierno por yuda nan. Segun Raoul Gravenstijn, coordinador di e bishitanan aki, a
splica cu na momento cu un bario wordo escogi, basa riba e hecho cu nan ta bay haya iluminacion,
funcionarionan di BoBario ta informa e habitantenan di bishita di Prome Minister y su team. Na mesun
momento nan ta recoge informacion di loke ta preocupacon di e ciudadanonan, cual ta motibo cu a scoge
e departamentonan menciona pa manda funcionario participa den e accion. “Mayoria di e peticionnan ta
relaciona cu infrastructura, principalmente iluminacion.”Gravenstijn a splica.

Funcionarionan di Oficina di City Inspector tur siman ta compaña Prome Minister Eman, mirando e
importancia di e pensamento pa conscientisa ciudadanonan pa mantene nan bario limpi. Danilo Prescot,
a splica “nos tur siman nos tey pa duna nos aporte na e maneho”. Danki Dios a constata cu e bisiñanan ta
recoge nan sushi pone dilanti cas, pero mester busca un forma pa deshaci di e sushinan aki, cu e
habitantenan mes no por hiba dump. Nan trabou ta pa controla y atende cu esnan cu no ta mantene nan
mes na reglanan. Esaki ta wordo splica den e Accion di Bario tambe na e habitantenan.

http://www.24ora.com/index.php?option=com_content&view=article&id=119571:prome-minister-
mike-eman-ricibi-cu-brasa-habri-den-bario-di-ponton&catid=1:local&Itemid=5