Page 37 - AWM 10MAART,2016

AWEMainta Diahuebs, 10 Maart 2016 37

Trahando hunto cu Slachtofferhulp y
otro instancianan

Polis buscando
alivio pa famia
den necesidad

CUERPO Policial e siman aki a ricibi un melding

tocante di un situacion menos bon di un famia cu ta
bibando cu tres yiu menor di edad den un condicion
deplorabel. Inmediatamente a bishita e cas situa na
Madiki y a bin constata cu e situacion cu nan ta bibando
aden mester di yudansa di diferente instancia.

Hunto cu Slachtofferhulp a envolve GKMB pa deshaci
di sanguranan cu a broei den un pos cu ta kibra y
Higienische Dienst pa inspecta e cas pa cu e situacion
di higiena.

Patrick Lacle, kende ta hefe suplente na Higienische
Dienst y Angelo Semerel, supervisor na GKMB, a splica
cu lo envolve tambe Serlimar y DOW pa cu limpiesa
rond di e cas.Esaki ta relaciona na criadero di sangura.

Vocero di Cuerpo Policial, Lito Lacle, kende ta entre
e prome personanan cu a yega na e cas, ta haci un
apelacion riba comunidad di Aruba pa yuda e muchanan
di e famia aki cu paña y si ta posibel otro donacionnan
cu por yuda mehora nan situacion.
Ta trata di tres hoben, un mucha homber di 10 aña y dos
mucha muhe di 7 y 9 aña, cu tur dia tin cu prepara pa
bay scol bou circunstancianan cu no ta apto.

Donacionnan por wordo entrega na nomber di
agentenan Vos y Nicolas na Warda di Polis di Oranjestad.
E muchanan ta biba cu nan mayornan den e cas cu no
tin ni awa ni coriente.

Patrick Lacle a agrega cu na ta acercando Directie Sociale
Zaken pa logra re-aloca e famia.
Di parti di GKMB a laga sa cu e sanguranan cu a haya
na e cas no ta Aedes Aegypti, cual ta transmiti Dengue,
Chikungunya y Zika, pero ta e sangura cu ta broei den
pos.

Pa loke ta trata e posibel criaderonan cu a haya na e cas,
esakinan lo mester wordo elimina pa sigura cu no tin
oportunidad pa Aedes Aegypti broei.

Cuerpo Policial ta haciendo tur loke ta posibel pa yuda
e famia aki pa yega na un miho situacion pa e tres
hobennan pa kende awo e situacion deplorabel ta haci
dificil pa nan por prepara pa scol y studia cu trankilidad
den un ambiente cu nan mester y merece.