Page 18 - WEB 10 February 2015_Neat

Dialuna 9 di februari pa 8 or di mainta a drenta un melding na APA cerca Havenmeester cu a detecta zeta
riba laman. A inicia e investigacion pa wak na unda e zeta ta drenta den laman. Al rededor di 9 or di
mainta a constata cu e fuente ta na WEB Aruba. A resulta cu tin un lek na e heater den un di e tankinan
di Heavy Fuel Oil di e compania di awa y energia.

Mesora gerencia di WEB a tuma contacto cu rampenbureau. Pa 9.30 or Havenmeester a notifica
Kustwacht pa nan haci inspeccion di costa. Pa 10.50 or a logra stop e leak na e tanki y a stop e fluho di
zeta den laman. A manda helicopter, Maritiem politie y team di Valero pa hunto cu Kustwacht haci e
inspeccion pa haya un bista con grandi e zeta a plama y pa por tuma accion pa limita daño na nos costa y
rif. E botonan a haci control for di costa banda di WEB te na California y a resulta cu ningun caminda tin
zeta canto di costa. E parti mas afecta ta e rif parti pa zuid di Varadero na e banda paden.

Entretanto e mesun mainta sr. Donata di rampenbureau a notifica Minister presidente y AHATA pa
informa hotelnan pa nan ta alerta, aunke no tawatin ningun indicacion di peliger pa hende. WEB a reuni
cu rampenbureau, Aruba Birdlife Conservation, Directie Scheepvaart, Valero y Directie Natuur en Milieu
pa asina coordina limpiesa di rif. WEB a encarga un contratista renombra pa haci e limpiesa. Tambe ta
den contacto estrecho cu Aruba Birdlife Conservation cu lo coordina e contacto cu otro gruponan
ambiental. Tur kimico cu lo uza pa e contratista ta wordo aproba pa Directie Natuur en Milieu pa esaki
no afecta flora y fauna riba rif y den laman. Entretanto a haya algun parha cubri cu zeta, cual a logra
captura y cu lo haya tratamento. Aparte di e trabou di limpiesa na rif, den e dianan benidero lo keda
inspecciona costa pa asina por tuma accion mesora si esaki ta necesario. Esnan cu ta nota algo canto di
costa of ta haya parha afecta, por tuma contacto cu departamento di relacion publico na WEB, via telefon
525-4671, via email info@webaruba.com of via pagina di Facebook di WEB Aruba NV.

Gerencia di WEB ta manda un palabra di gratitud na tur instancia concerni pa nan cooperacion y rapides
den tratamento di e incidente lamentabel aki. Lo sigui un investigacion interno pa mira con por preveni
un suceso parecido den futuro.