Page 31 - MIN ON

Hobennan cu ta sali di ARUMIL ora nan edad yega pronto
por drenta den servicio di gobierno

Monday, 08 May 2017 20:12
Comparti

Directora di DRH (Departamento di Recurso Humano) Omaira Lares hunto cu su team y un
representante di Arubaanse Militie (Arumil)
a tene un reunion cu Prome Minister Eman y un consehero pa discuti algun punto importante pa futuro
di hobennan cu ta sali di Arumil. Sra. Lares a splica kico ta intencion cu e hobennan aki despues cu nan
edad yega cu nan mester bay.

"E 'manschappen' di Arumil ta drenta servicio cu un contract y ora nan edad yega pa bay nan no por
drenta den servicio di gobierno. E otro grupo di Arumil, e asina yama 'kaderleden' cu tin e funcion di
korporaal bay ariba, si por drenta den servicio di gobierno. Nan por drenta cu e salario cu nan tabatin
den Arumil. Esaki pa e manschappennan no ta posibel. Aki'aya un tabata drenta den servicio, pero nan
opleiding den militie no ta di un nivel MBO acredita. Esaki ta nifica cu si nan drenta gobierno nan ta
baha di schaal 4 pa schaal 3. E meta di e reunionnan cu nos ta atendiendo ta pa nivela esaki, cu nan ta
drenta den gobierno cu un funcion sigura y cu nan ta bay den training y haya curso pa bira p.e. un
duanero, bira miembro di Kustwacht, CEA of bira polis. Nan por wordo aloca den servicio gubernamental
pa traha den administratie tambe of drenta IBISA pa sigui opleiding pa bira sportinspecteur. Nan ta
hobennan bon entrena y awor nos mester percura pa nan entrada den servicio di gobierno bay mas
flexibel."
Lares a splica cu pa aña ta trata di mas o menos 5 pa 12 hoben cu ta sali di Arumil, di cual tres ta
korporaal. E areglo aki no ta cu forsa retroactivo, pero ta algo completamente nobo. Hopi di esnan cu a
sali di Arumil caba a drenta sector priva. "Nos mester trata na evita cu nos ta perde hobennan bon
forma." Segun Lares e motibo cu esaki nunca e keda formalisa ta pasobra tabatin falta di comunicacion.
Dia 5 di otro luna ta sigui un otro reunion riba e topico aki. "E ora DRH tin un proposicion cla caba",
Lares a bisa.