Page 31 - HOSPITAAL 19 JUNE 2017

Salubridad ta bon danki na e 100 añanan di existencia di
Salubridad Publico na Aruba

Sunday, 18 June 2017 12:46
Comparti

Diabierna a celebra 100 aña di existencia di salubridad publico na Aruba. Minister di Salud Publico, Cuido di Nos
Grandinan y Deporte, Dr. Carlos “Alex” Schwengle tambe a celebra e dia cu e personal di Directie Volksgezondheid y
tabata contento di a siña mas di e historia con salud publico a inicia. Minister Dr. Schwengle a gradici empleadonan
pa nan bon trabou y tambe a gradici e Director di DVG pa haci e celebracion pe empleadonan.

Pa loke ta trata higiena den centro nan di cuido e aspecto aki ta keda un prioridad. E salanan di operacion mester
uno nobo y a haci un esfuerso grandi, pero a dicidi di uza e protocol di higiena mas estrecho y esey so a baha
infeccion 20 pa 30 porciento. No a agrega un antibiotica nobo, pero keda pone enfasis riba prevencion di
enfermedadnan contagioso ta keda un tarea importante pa Salubridad Publico, Minister Schwengle a duna di
conoce.

Awo e enfoke ta moviendo y e prevencion di enfermedadnan cronico ta hopi importante, pasobra tin un epidemia
grandi y Aruba no ta e unico den esey. Aruba ta parti di comunidad internacional y internacionalmente tur pais tin
problema cu enfermedadnan cronico, esta diabetes, hipertension, etc.

“Nos ta haciendo bon trabou y mi ta hopi orguyoso di boso tur. Boso tur ta aportando un grano no solamente na
prevencion di enfermedadnan contagioso, pero tambe enfermedadnan cronico”, Minister Schwengle a expresa.
Minister Schwengle tabatin un idea di e trabounan di e empleadonan di DVG, pero su aprecio pa nan trabou a crece
hopi mas den e ultimo 4 aña.

Sin e empleadonan di DVG hopi cos no por haci aki na Aruba, pasobra tur hende ta enfoca pa bay biaha y bay cerca e
ciruhano cu a haci operacion agudo y a salba un bida. Si e empleadonan di departamento di salubridad no t’ey, e
ciruhano no ta logra haci su trabou pasobra mester traha como un team. Tur mester traha hunto cu un meta pa asina
tene e salubridad bon pa Aruba.

Minister Schwengle hunto cu Prome Minister Mike Eman a planta mata di sorsaca y a haci esaki pa stimula
comunidad di Aruba pa haci mescos. “Si cada cas planta 4 mata di fruta, lo bay tin hopi mas salud pa nos tur”,
Minister Schwengle a duna di conoce. E fruta di sorsaca no ta solamente bon pa salud, bon pa digestion, pero ta haci
uzo di e foyonan pa baha presion. Tin bukinan di medicina natural, pero ciencia lo mester bay haci investigacion pa
haya sa e berdad di kico ta e balor di matanan di fruta y otro matanan di Aruba cu ta uza den salubridad.