Page 26 - AweMainta14Nov2015

26 AWEMainta Diasabra, 14 November 2015

Prome Minister
Eman presente
na inauguracion
Clubhuis Riverplate

DURANTE inauguracion di clubhuis di Riverplate, Prome Minister Mike

Eman a haci un promesa di haci tur lo posibel p’e club aki den futuro tambe
por dispone di un cancha cu yerba artificial. Un anuncio cu a wordo ricibi
cu aplauso dor di e simpatisantenan presente. Gabinete Mike Eman I y II a
pone tur empeño, mirando cu Gobierno mes no tin e recursonan necesario pa
yuda tur club, pa busca e forma con mehora e instalacionnan di Riverplate.
P’esaki a haya aprobacion di Parlamento pa haci algun inversion den e
instalacionnan.

Durante e ceremonia di inauguracion di e clubhuis, realisa dor di Victoria
Sevinger y Lucasio Thomas, a gradici esnan cu a bin cu e idea pa lanta un
organisacion deportivo p’e bario di Madiki y Rancho. Tabata trata aki di
Nathaniel Andrews (d.f.m.), fundador hunto cu e dos co-fundadornan Luis
Brito (d.f.m.) y Lucasio Thomas. Prome Minister Eman a probecha di e
ocasion pa señala cu e yiu di e bario aki Minister Benny Sevinger, ta trahando
riba un cantidad grandi di proyecto cu tin como meta mehora e calidad di
bida di e ciudadanonan, drechando e esfera rond di e viviendanan, pero
tambe mehoracion di e instalacionnan deportivo.

“Den esaki e mehoracion di e canchanan deportivo di e clubnan ta halto
riba nos lista. Tin bes fondonan no ta alcansa nos, pero ta sali afo y busca
otro pa yuda patrocina y tin biaha nos mes ta yuda poniendo man na obra.
Di e forma aki ta brinda oportunidad n’e hobennan pa desaroya nan mes
optimalmente.” Proyecto di Riverplate tabatin un balor adicional pa Minister
Sevinger, Eman a splica, ya cu el a pasa hopi di e añanan di su infancia y
hubentud riba e veld di Riverplate.

Na mesun momento e mandatario a haci un anuncio importante. “Nos tur ta
bay traha hopi duro pa por realisa e siguiente proyecto pa Riverplate cu ta
un cancha di yerba.”Ministernan Mike Eman y Sevinger a duna cooperacion
na club Riverplate por medio di departamentonan di DOW, DIP, InfraTeam
y Team BoBario.