Page 19 - MIN VOS_Neat
P. 19
POR ta sali di e punto di bista cu mester crea un infrastructura na unda mantenimiento y
maneho di e lugarnan aki ta bay hunto. Mester structura y separa placa di e presupuesto
di deporte p’asina e inversionnan aki no bay perdi, según Jacky van Putten.
Un di e problemanan mas grandi cu deporte semper ta confronta cu ne ta ora
Gobiernonan cambia e continuidad den maneho ta bay perdi.
Ta manera ora un Gobierno nobo sinta nan ta lubida cu placa di pueblo a wordo inverti
den e facilidadnan aki, aunke dor di otro Gobierno. E consecuencia lamentabel ta cu
manehonan ta wordo cambia, of miho dicho neglisha lubidando loke ya nos tin.
Asina cada bes e deporte Arubiano ta sufri pa falta di vision a largo plaso. Esaki mi por a
mira cada bes cu Gobierno cambia, trahando 34 aña den Gobierno den e departamento di
deporte, IDEFRE/IBiSA, van Putten ta splica.
Ta di suma importancia pa pone full atencion rib’e condicion di nos facilidadnan
existente. Mester inventarisa e condicion financiero di nos deporte prome cu cuminsa
anuncia mas proyecto miyonario sabiendo cu esnan cu nos tin awor ta cayendo den otro
pa falta di maneho y placa. Esaki ta iresponsabel y simplemente destruccion di capital.
Nos mester cu urgencia drecha, upgrade nos facilidadnan deportivo prome y haci nan
acesibel pa nos scolnan, federacion y publico deportivo na un costo subsidia pa Lotto.
E facilidadnan mester bira multi uzo na unda lo brinda e posibilidad pa pratica diferente
deporte.
Mester bin cu un maneho na unda mester reserva fondonan pa mantene e facilidad
deportivo nobo y existente. Si ta bay presta pa inverti den proyectonan nobo mester mara
e inversion aki tambe cu un capital pa mantene e facilidad, van Putten ta mustra.
Gobiernonan tin e custumber pa core inverti den edificionan nobo, pero ta lubida cu
mester mantene e facilidadnan aki. Cada bes cu inverti den facilidadnan nobo esaki ta bay
a costo di e placa cu nos mester pa inverti den e maneho di deporte.
Deporte na Aruba na e momento aki no ta sufri pa falta di facilidad sino falta di maneho.
E idea cu cada bes mester demostra cu construccion ta e maneho mester stop.
