Page 28 - MIN VOS_Neat

Parlamentario mr. Juan E. Thijsen a tuma nota cu Ministro Richard Arends a sali caba
desmenti cualkier retrazo y ta spera cu no tin retrazo pero Gobierno di Mike Eman a
demostra cu nan no ta di confia. Cualkier retrazo tin consecuencia grave pa Aruba.

Segun Parlamentario mr. Juan E. Thijsen ta bon conoci cu tur cifra presenta pa Gobierno
di Aruba den nan maneho financiero ta basa riba un reapertura di e refineria riba termino
corto. Esey kier men cifranan y pues cubrimento di gastonan ta sufri retrazonan cu
consecuencia cu Gobierno mester busca otro forma pa cubri su deficitnan y por nifica
mas medida na caminda.

No solamente Gobierno ta haye den problema sino full e sector priva ta bin den problema
ora cu e proyecto di Citgo ta haya retrazo na unda empleo ta haya retrazo y comercio
rond di e refineria tambe ta haya golpi.

Segun Parlamentario mr. Juan E. Thijsen ta bisto cu Gobierno di AVP ta den
problemanan serio pa cu nos economia y pio ainda no tin luz na horizonte cu e Gobierno
aki mas.

Turismo no a yega e 1.5% di GDP di crecemento cu Gobierno ta calcula y apesar di e
refineria, cu of sin atrazo, Aruba su economia bao AVP no ta duna e crecemento
economico cu e compromisonan grandi di nos pais ta exigi.

E unico luz na horizonte ta un victoria electoral di partido MEP pa introduci un maneho
creativo y agresivo pa diversifica y stimula nos economia efectivamente riba termino
cortico, mediano y largo plazo.

E maneho aki lo mester bay yega na un crecemento economico mucho mas halto cu
Gobierno di AVP ta ofrece pa aña pa Aruba por sali for di tur su problemanan.

Segun Parlamentario mr. Juan E. Thijsen e ta un meta dificil, pero cu boluntad y
capacidad Aruba lo logra. Su persona y partido MEP ta cla p’e reto. Aruba merece mihor.
Hunto p’e cambio.