Page 21 - AWEMAINTA-EDITION-2105

Diasabra 21 di Mei 2022

UN SNECHI DI PALABRA DI DIOS

V DIADOMINGO DI RESURECCION

15.05.22 #363
I lectura: Echo 14, 21-27
Salmo: 145
II lectura: Rev 21, 1-5
Ev: Hn 13, 31-35

Despues di Ultimo Cena, Hudas a sali bay. E ora ey Hesus a bisa: “Awor Yiu di hende ta haya gloria y Dios ta haya gloria pa medio
di djE. Si Dios haya gloria pa medio di djE, Dios lo demostra gloria di Yiu di hende den Dios mes tambe y Dios ta bay haci esaki
umbes. Mi yiunan stima, lo Mi no ta pa mucho tempo mas hunto cu boso. Mi ta duna boso un mandamento nobo: Stima otro!
Manera Ami a stima boso, asina boso tambe mester stima otro. Si boso stima otro, tur hende lo sa cu boso ta mi discipelnan.”

Palabra di Señor.

MENSAHE

Apesar cu nos ta den tempo di Pasco di Resureccion y cada dia mas cerca di e solemnidad di Ascencion di Hesus, texto di
evangelio di awe ta referi na un echo cu a tuma luga finalisando ultimo cena, den vispera di morto di Hesus. Ta trata di un
mensahe clave di enseñansa di Hesus: amor di prohimo. Ban pone atencion na e forma cu Hesus ta expresa e mensahe aki.
E no ta djis un bon conseho pa nos stima otro. Hesus ta expres’e den un forma imperativo cu un verbo cu ta exigi accion. Hesus
ta bisa: “Mi ta duna boso un mandamento nobo: Stima otro”.
Kisas e palabra “obligacion” no ta bay di acuerdo cu libertad cu semper Dios ta duna ser humano, pero mandato (mandamento)
ta un obligacion.
Por bisa di e siguiente manera: nos mester stima otro si nos kier biba feliz; nos mester stima otro pa alcansa salbacion; nos
mester stima otro pa hende reconoce cu nos ta discipelnan di Hesus.
Den caso contrario si a base di nos libertad nos ta scoge di no acepta e mandamento aki nos lo contradeci cu nos ta
siguidonan di Cristo cu ta amor mes y nos ta pone na peliger nos salbacion. Den e sentido aki nos mester acepta e
mandamento di amor como algo mas cu un simpel conseho. Hesus tambe ta splica nos di ki forma nos mester stima
otro.
Si den pasado Hesus a bisa cu nos mester stima otro manera nos ta stima nos mes (Mt 22, 39), awor E ta manda nos
practica amor den un grado superior: ‘stima otro manera Ami a stima boso….’ Anto Hesus su amor ta te na fin, te na e
extremo di entrega su bida pa pecadonan. (Hn 13,1) Esey ta e midi di amor divino – te na fin.
San Bernardo de Claraval a bisa despues: “E unico midi di amor mester ta amor sin midi” asina Hesus ta stima nos y
asina nos mester stima Dios y otro, sin pone ningun limite.
Finalmente Hesus ta afirma cu solamente si nos ta stima nos prohimo mundo por reconoce cu nos ta cristiannan.
No ta nos documento di bautismo, nos participacion den eucaristia, actividadnan pastoral of cantidad di oracion ta
determina esey sino nos amor pa cu prohimo. Stima otro!

ORACION
Danki Señor pa Bo amor.
Siña mi stima otro manera Abo ta stima mi.

PROPOSITO
Mustra e siman aki mas amabilidad pa tur esnan cu kende lo bo comparti.

21