Page 36 - RDA

Presidente di ATIA Ronnie van trigt y su directiva tin masha preocupacion pa algun

problema cu nan ta mira na Aruba. Un di esakinan ta e grupo di personanan indocumenta

cu ta participando den e mercado laboral.

Nan ta sinti cu si bay aumenta e salario minimo, esaki por tin consecuencia cu e

hendenan ta bay haci mas uzo di e personanan indocumenta, cu no ta aportando cu nada

na caha di Gobierno. ATIA ta sali for di un cifra di 6 mil persona indocumenta na Aruba,

aunke cu nan ta kere cu e ta mas grandi. Pero no mester keda sin tene cuenta cu e

situacion reinante na e pais bisiña Venezuela unda e hendenan ta biba den un situacion

precario y ta busca tur forma pa sali di esaki. “Na Aruba nos tin hopi hende caba ….,” el

a bisa.

Si sali for di e punto di bista cu tin 6 mil trahado ilegal, anto nan por bisa cu esaki ta un

10% di esnan cu ta empleado no tin documento legal. E ta un forsa riba su mes cu ta

afecta economia enormemente y ta afecta e entradanan cu Gobierno mester pa funciona.

Pero pa comercio tambe, segun Van Trigt, pasobra bo no por crea un level play fiel y un

economia creciente tanten cu tin e tipo di desbalansenan aki den e economia.

Pa e motibo ariba menciona, ATIA ta haci un yamada fuerte na Minister di Labor y otro

ministerionan cu tin di haber cu esaki, y e aumento di salario, pa traha hunto cu comercio

y instancianan social pa mira con ta remedia e tipo di condicionnan aki cu a crece na

Aruba pero cu awor mester di haya su atencion. Aworaki e gastonan di comercio ta halto,

tin un economia cu no ta creciendo manera debe ser, e inflacion ta abou y awor a haya e

noticia desagradabel cu mas di 300 persona lo perde nan trabou na CITGO. Esaki tin e

mesun impacto cu si un hotel na Aruba dal su portanan cera. Van Trigt a bisa cu ta hunto

por soluciona tur e problemanan aki.