Page 7 - MIN ON

"E presentacion aki ta pa brinda e hobennan oportunidad
con haci nan escogencianan pa futuro"

Friday, 16 June 2017 21:01
Comparti

Den e siman aki Minister mr. drs. Richard Arends a duna un tremendo presentacion na scol secundario
Colegio San Antonio na Santa Cruz. E presentacion bon prepara, tabata pa e studiantenan di derde klas
MAVO cu a scoge economia den nan pakete pa haci examen aden otro aña. Minister Arends na final a
keda satisfecho cu e atendencia y interes di e hobennan.

"Esaki pa mi ta algo completamente otro di loke mi ta haci normalmente como minister", Arends a bisa
despues di su charla na e hobennan. "No ta algo comun, pero si algo cu mi a haci cu un sentido di hopi
satisfaccion. Mi kier a felicita directiva di e scol aki cu a brinda e oportunidad aki na e muchanan. Di e
forma aki nan por tende y siña kico ta e profesionnan cu tin na Aruba. Nan ta na e punto pa kies nan
pakete pa haci examen aden otro aña. Esaki ta algo cu ta destina nan desaroyo profesional den e
siguiente fase di nan bida." Minister Arends a bisa cu para dilanti e klas di hobennan el a splica kico su
trabou como minister di economia ta encera, pero tambe e oportunidadnan cu tin eyfo pa cada un di nan.
"Loke cu mi a pone enfasis riba dje ta cua ta e oportunidadnan cu nos como dirigente ta brinda nan pa
nan futuro. Gobierno ta haci distincion den cuatro top sector cu ta: tecnologia limpi, industria creativo,
exportacion di conocemento y logistica.

E presentacion aki ta pa inspira nan den haci nan escogencianan, pero tambe duna nan un tipo di
siguransa cu gobierno di Aruba, Gabinete Mike Eman, ta pensa riba nan futuro. Ta pensa riba e
oportunidadnan cu por tin, no solamente den e sector laboral, pero tambe e desaroyo profesional y
intelectual di e studiantenan aki." Minister Arends a keda satisfecho cu e acogida ricibi tanto door di
tanto scol como di e studiantenan cu a mustra nan interes pa e topico aki.

http://www.24ora.com/index.php?option=com_content&view=article&id=123067:qe-presentacion-aki-
ta-pa-brinda-e-hobennan-oportunidad-con-haci-nan-escogencianan-pa-
futuroq&catid=12:politica&Itemid=18