Page 23 - MIN ARENDS

Atencion pa, presencia den y trabou di AVP na Santa Cruz ta
continua AVP na Santa Cruz

Tuesday, 20 June 2017 18:57
Comparti

Un team grandi di AVP a drenta Santa Cruz fin di siman cu a pasa. Banda di 9’or di anochi porfin e
bishitanan a culmina, cu un team totalmente entusiasma pa sigui e trabounan pa haci henter Aruba
berde. Na final, lider di Partido di Pueblo Arubano (AVP) Mike Eman a expresa su satisfaccion y di biaha
gradici e ekipo di AVP na Santa Cruz cu a haci un bon trabou di coordinacion.

“Nos parti a cuminsa na Rooi Bosal, na un skina bon conoci y cu el a bira berde mientras candidatonan
tabata tur caminda. Despues nos a bay Jan Flemming y aki tambe e evidencia di nos presencia ta con
berde el a keda,” asina Eman a declara na un di e ultimo casnan cu a bishita. “Nos ta contento cu e
recepcion y na final di e anochi nos a yega na cas di famia Morillo, un famia dedica na deporte y e
recepcion ta grandi na Angochi tambe unda e trabou ta continua.” Jose Wever ta forma parti di e ekipo ey
di Santa Cruz cu a prepara e bishitanan y a compaña e lider di AVP henter dia. El a splica di su conviccion
pa haci e trabou aki y con contento e ta cu e reaccion di e habitantenan di Santa Cruz. “Poco hende na
mundo por ta para banda di un Prome Minister. Mi ta consciente di tur cos cu bo a haci y nos ta hopi
agradecido y contento. Pueblo di Aruba no ta keda nada otro pa pensa cu nos ta bibando hopi tempo cu
Mike Eman y nos ta sigui biba cu Mike Eman,” Wever a bisa pidiendo tur hende un aplauso pa Mike
Eman. Doño di cas mes, esta Sr. Pedro Morillo, conoci cariñosamente como ‘Pedon’ ta den directiva di
S.V. Arsenal y pa su persona tabata un placer di ricibi bishita di e lider politico, pero sigur tambe di tende
di e plannan cu Gobierno tin pa drecha e facilidadnan deportivo di e bario, mescos cu a haci caba na otro
puntonan di Aruba.

“Mi famia y ami ta masha contento cu nos a ricibi bishita di ‘MinPres’ Mike Eman. E ta un bon amigo, mi
tin bon amistad cu ne; no ta di awo, di basta aña caba. Mi a bis’e mi deseo y el a caba di informa cu
Arsenal lo haya un cancha y ora cu esey keda cla, nos lo dal un partido hunto.” Na final di e encuentro na
Angochi, Eman a duna di conoce cu e bishitanan den Santa Cruz lo continua. “Nos tin hopi bario pa
bishita ainda y hopi bario den Santa Cruz tambe. E compromiso ta pa nos cana y yega na tur cas cu a pidi
nos presencia, kier men nos no lo descansa te ora nos yega tur cas y finalmente te ora felicidad por yega
den tur hogar di Aruba,” asina e lider di AVP a conclui bisando.