Page 14 - MIN VOS NOV 23, 2015

Minister dr. Alex Schwengle lo bay Parlamento pa salanan
di operacion

Publication: Monday, 23 November 2015. Categoria: General
Proceso largo andando
Ora plannan y presupuesto ta cla

ORANJESTAD (AAN): Cu un feitenonderzoek pidi pa Parlamento andando di parti di hospital
pa haya sa exactamente pakico no a incorpora Sala di Operacion nobo den e plannan di
renobacion y expansion di hospital, e proceso pa yega na e sala di operacion nobo ta sigui e
curso cu e mester sigui.
Minister dr. Alex Schwengle ta splica cu ora cu e “schets” a wordo comberti den plannan y un
presupuesto difinitivo e lo presenta esaki na Ministerraad y lo dialoga cu Parlamento tocante tur
detaye.
E mandatario ta agrega cu e ta un persona cu kier tur proceso cana mas lihe, pero debi na e nivel
di calidad haltisimo y detayenan cu mester anda masha meticuloso cu nan, e proceso ta tumando
un poco largo den su opinion.
Sinembargo, despues cu el a pone mas atencion na con casonan di planning di proyectonan
similar ta wordo maneha den exterior – na Hulanda y Merca, e sa cu e proceso por tuma entre
seis pa 12 luna. Pues, e tempo cu ta tumando pa haci e planning y traha e presupuesto na Aruba
ta masha normal.
Aruba no por sigui cu e sala di operacion actual, pasobra tin risico pa e compania di seguro stop
e seguro di hospital. Minister Schwengle ta añadi cu no ta drama e ta haci, pero si keda cu e sala
di operacion bieu, sin prueba cu ta bin uno nobo, e seguro lo para e cobertura.