Page 107 - KPA

Un averahe di 30 ilegal pa luna tawata drenta Aruba via nos
costa den pasado

Tuesday, 13 June 2017 17:26
Comparti

Politiconan populista ta buscando diferente forma di desgaba e Ministerio di Husticia y den nan intento,
sa scucha diferente ponencianan infunda. Por ehempel a scucha wordo bisa cu mester bin bek cu e radar
y tambe helicopter.

Realidad ta, cu Aruba tin radar cu ta funcionando perfectamente y den un acuerdo di lasonan estrecho
entre Cuerpo Policial y tambe Kustwacht Aruba, Cuerpo Policial por haci uzo di e helicopter di Kustwacht
na momento cu tin mester di esaki. Antes, esta prome cu 2010, Aruba tawata wordo asota continuamente
cu botonan cu tawata trece ilegalnan den marduga y kendenan tawata logra di drenta continuamente.
Hasta tawata haña lanchanan peñero abandona na parti pa nort di nos isla y despues cu polis haci
investigacion riba esakinan, ta wordo constata cu esaki nan tawata lanchanan special pa transporta
droga. No por keda sin accentua cu e averahe di ilegalnan cu tawata subi tera, tawata di 30 persona pa
luna prome cu 2010, mientras cu awendia e averahe ta 20 den henter un aña, esta 340 persona ilegal
menos ta logra drenta ilegalmente via nos costanan. Nos por corda di varios casonan lamentabel,
caminda hendenan a hoga, den nan intento pa yega Aruba di un forma ilegal.

Pa loke ta trata e lanchanan cu ta transporta droga, cu antes continuamente tawata wordo descubri na e
parti pa nort di nos isla, ya casi bo no sa tende di esaki mes mas. Dia c’un di e lanchanan aki mester logra
drenta, e lo bira un noticia di sensacion, pasobra cu e no ta algo comun mas manera e tawata antes. E
control rigido y esfuersonan strategico aki a wordo crea netamente pa e titular encarga cu husticia, esta
Minister Arthur Dowers. Na e momentonan aki, ta bay reenforsa e controlnan di nos costanan, door di
adkiri mas material nobo.