Page 26 - MIN ON - MAY 28,2015

Prome Minister Mike Eman ta reta studiantenan di e prome
Aruba Summer School

Wednesday, 27 May 2015 16:55
Comparti

Caribbean Branch TNO, CBOT y Arizona State University, ASU e siman aki a seya nan colaboracion di
mas di dos aña cu otro programa academico, na Aruba. Awor e dos partnernan scientifico aki a expande
nan cooperacion cu Universidad di Aruba, UA, tambe.

E siman aki, studiantenan na nivel Bachelor's y Masters di ASU como tambe di University of West Indies
a incia nan participacion den e Aruba Summer School, programa titula "Aruba Sustainable Island
Solutions' na UA. Director di CBOT Jan Ebbing a yama tur e studiantenan bon bini, den presencia di
Rector di UA Glenn THode y Prome Minister Mike Eman, kende tabata invitado special pa e sesion di
apertura.

Sr. Ebbing na e ocasion a bisa cu e Aruba Summer School for di comienzo tabata un obhetivo di CBOT y
ta e resultado di un cooperacion hopi sera cu ta existi entre ASU y UA. El a splica di e contribucion di
ehecutivonan di CBOT den preparacion di e programa cu ta permiti e studiantenan haya oportunidad pa
conoce mas di e esfuersonan di Aruba den e area di sostenibilidad y particularmente, den su obhetivo pa
bira independiente di fuentenan di energia no renobabel pa 2020.

Ademas, Sr. Ebbing a duna e studiantenan un splicacion general di e papel di TNO. TNO, cu ta e
Organizacion Hulandes pa Investigacion Scientifico Aplica, a keda estableci na 1932 y como un compania
independiente sin fin di ganashi, tin como mision pa conecta hende y conocemento pa crea inovacion cu
mester stimula e forsa competitivo sostenibel di industria y bienestar di sociedad.

Prome Minister Mike Eman a mira e potencial di TNO pa realisacion di e plannan di Aruba pa e
transicion rapido na un oferta di energia renobabel y a facilita pa TNO por a habri su oficina den Caribe
na Aruba, esta e Caribbean Branch di TNO, na 2011. Obhetivo di CBOT ta pa sostene Aruba den su
metanan pa medio di investigacion di tecnologia aplica, den colaboracion cu companianan local,
gobierno y institucionnan academico. Den e caso aki, cu ASU y UA.

Cu e decision pa establece e oficina na Aruba, TNO ta mira Aruba como un base for di cua por yega na
resto di e region Caribense y Latino America. Su expertonan qualifica y local ya caba ta asistiendo varios
proyecto den region, unda ta cubri diferente area, entre otro inovacion industrial, energia, transporte y
planificacion urbano, entre otro.

Rector di UA Glenn Thode a expresa su satisfaccion di por tin e colaboracion cu CBOT y ASU pa e
programa di e Aruba Summer School, cu ta parti di un plan mas ambicioso, esta e Facultad Berde di e
Universidad. "E 'Green Faculty' ta basa riba e principio di intercambio di docente y studiante cu ta
fuertemente enfoca riba tecnologianan di sostenibilidad y con pa desaroya sociedadnan sostenibel. ASU
ta un di e institucionnan mas reconoci riba e area aki na Merca y nos ta contento cu e partnership aki."