Page 18 - HOH Feb 19

Mervin Wyatt-Ras Nos tur mester combati e malesa Zika

Thursday, 18 February 2016 16:56
Comparti

Parlamentario Mervin Wyatt-Ras a comenta riba e anuncio di gobierno cu a pone un suma di Als.
500.000 adicional pa atende na un forma preventivo cu e virus di Zika. Aunke segun Parlamentario
Wyatt-Ras a tarda un tiki, e ta contento cu ta pone prioridad pa atende cu e malesa Zika.

E parlamentario durante reunion publico cu a trata presupuesto dia 1 di februari den nomber di fraccion
a presenta un mocion pa gobierno presenta un plan pa preveni y combati Zika, cual mocion a keda
aproba unanimamente. Dia 10 di februari Parlamento a haya un presentacon di gobierno encuanto tur
loke nan ta y a haci te cu awor y plannan pa e tempo venidero. Tabatin 4 caso den investigacion y un par
di dia despues, esta dia 12 di februari, gobierno a anuncia cu e casonan a resuluta positivo. Mientrastanto
tin 6 caso mas cu a surgi di personanan contagia aki na Aruba mes. Pesey mes ta di importancia pa actua
liher y combati criaderonan conforme loke WHO y otro paisnan tambe ta propone y haci. Wyatt-Ras ta
haya cu salud di nos pueblo mester ta na promer lugar en especial ora ta trata futuro mamanan cu tin cu
haya suficiente informacion con pa preveni. E parlamentario ta haya di importancia pa nos hendenan
haya suficiente informacion pa asina nan por actua na un forma corecto pa por evita di haya e malesa,
tambe ora nan viaha. P.e. bisti manga largo, uza locionnan antirepelente, etc. Alavez tin cu haci un
campanja cu nos hendenan ta bai evalua na cas y rond di nan cas y elimina criaderonan, p.e. potchinan di
mata cu tin sangura, awa di banja, awa cu ta sali for di airco, autonan bieuw den cura, matanan y otro
obhetonan cu tin criadero.

Wyatt-Ras a pidi atencion alavez pa areanan di risico manera Pos Chikito y Savaneta pa eybanda sigur
swipe. Ya caba nos ta riba lista di paisnan cu tin e malesa. Esaki ta haci cu nos mester activamente bai
busca criaderonan y actua mesora. Alavez y ya caba gobierno a haci e contactonan necesario, tin cu traha
conhuntamente cu ATA y AHATA pa calma turistanan y suministra turistana cu informacion necesario
pa nan por preveni. Esaki lo haci turistanan mas trankil tambe. Wyatt-Ras kier haci un apelacion na nos
dokternan di cas tambe pa meld na DESPA di patientnan cu posiblemente tin simptomanan cu por
indica cu tin Zika. Si e patientnan mes no bai pa haci un test, tog lo por fumiga pa asina preveni cu
posibel malesa por wordo transmiti. Na nivel mundial, esta riba nive di macro tin bon cooperacion. Riba
nivel micro y den nos comunidad nos como ciudadano mester coopera y traha hunto pa por ataca e virus
di ZIKA. Campanjanan di concientisacionnan no tin cu ser limita solamente na famianan sino tambe na
skolnan y tur unda tin muchanan na cantidad grandi. Aruba hunto tin cu combati ZIKA. Parlamento
sigur lo keda pendiente di un evaluacion di tur e accionnan cu lo ser entama.

http://www.24ora.com/politica-mainmenu-18/105459-mervin-wyatt-ras-nos-tur-mester-combati-e-
malesa-zika