Page 4 - AAA 30 JUNE 2017
P. 4
Aeropuerto di Aruba lo inicia proyecto di
rehabilitacion di gate 1 y 2
June 30, 2017
ORANJESTAD (AAN)—- Aruba Airport Authority N.V. (AAA) lo duna inicio na un proyecto di rehabilitacion di e posicionnan di
parkeo 1 y 2 balora na 7 miyon dollar. E proyecto lo encera cambio di e superficie di concreet, instalacion di e infrastructura pa
e fuel hydrant system, y e relocacion di e fundeshi nobo pa e brugnan pa pasahero, pa asina aumenta e tamaño di gate 2 pa
acomoda avionnan tipo wide-body di categoria “E” manera avionnan B-787 y A-330.
E proyecto lo conclui cu e instalacion di 2 brug di pasahero nobo. E proyecto ta parti di aeropuerto su programa continuo di
mehoracion di capital pa renoba partinan cu ta birando bieu y si ta posibel mehora e flexibilidad di e facilidadnan di aeropuerto.
E proyecto lo tuma lugar den 2 fase; fase 1 lo cuminsa Dialuna, 3 di Juli y lo rekeri pa aeropuerto sera posicionnan di parkeer 2 y
3 pa un periodo di 6 siman. Ora cu fase 1 keda cla, fase 2 lo cuminsa, unda cu gate 3 lo bolbe den servicio mientras cu gate 1 y 2
lo wordo sera pa un periodo di 4 luna, cu fecha pa keda cla dia 14 di December, 2017. E ceramento di e gatenan lo causa un
cantidad di reto pa e operacionnan diario pa aeropuerto, pero varios proceso pa por traha rond di e proyecto lo wordo
implementa pa asina minimalisa e impacto riba e pasahero y operacionnan di avion.
Manager di Airport Development Monthy Croes ta hopi optimista riba e proyecto: “E proyecto aki a wordo bon planea y nos ta
ansioso pa cuminsa cu e ehecucion. Nunca lo tin un momento ideal pa reduci capacidad na un aeropuerto cu ta opera cu
volumennan peak, pero e proyecto aki ta critico pa por sigui mantene e facilidadnan di aeropuerto, y ora e keda completa, lo
duna e ekipo di operations mas flexibilidad na momento di traha e schedule y na mes momento ta renoba infrastructura cu a
bira bieu, cu ta di suma importancia pa un aeropuerto moderno. Nos enfoke lo ta pa sigura cu e proyecto wordo entrega na
tempo, prome cu e temporada peak di winter”
http://www.diario.aw/2017/06/aeropuerto-di-aruba-lo-inicia-proyecto-di-rehabilitacion-di-gate-1-y-2/
