Page 2 - Solo Di Pueblo
P. 2
Pagina 18 Dialuna 28 December 2015
E di dos iStore na Aruba recientemente a
wordo inaugura den Caya Betico Croes
E duo di tata y yiu, co-propietarionan y co-directornan
di e iStore na Aruba, Milo J. Croes y Jouel M. Croes, ta
rebendedornan autoriza di computer di Apple riba e isla,
desde 1994.
Na 2009 nan a bira dunadornan di servicio tambe. Y ora
cu na Oktober di 2011 Apple iStores a cuminsa habri
rond mundo, nan tambe a dicidi di forma parti di esaki
cu Aruba su mesun iStore, cla pa sirbi e mercado local
y turistico.
E negoshi a crece liher y a rekeri un expansion e
siguiente aña. Despues el a habri bek na 2012 como un
bunite diseña iStore ofreciendo un espacio di compras
moderno di dos piso, concebi pa partner Jouel Croes di
Croes Architecture Studio N.V. E tienda a bira e cas di
e Specialistanan di Apple, dunando servicio y educando
e comunidad na e adres original, Ponton 67B, unidad 5.
Na 2015, e duo visionario di tata y yiu a dicidi di
habri un tienda similar den cayagrandi, demostrando
nan confianza total den Aruba su economia y nan
confianza den e renacimento di Caya Betico Croes y
e posibilidadnan prometedor di compras cu a presenta
nan mes cu e renobacion di Playa den Oranjestad.
E tienda den caya grandi ta ofrece e liña completo di
producto di Apple, incluyendo desktops, portables,
laptops, iPods, iPads y accesorionan. E tienda ta
conta cu un Genius Bar, un sala di inventaris, y un
centro educacional unda clientenan por siña con pa
usa e tecnologia, y familiariza nan mes cu su variedad
increible di posibilidadnan. E tienda di tecnologia
moderno cu su arquitectura simpel, bentananan grandi
di glas y luz natural, ta un reflexion di e filosofia di Apple
cual ta uni funcion cu un estetica contemporaneo. Ekipa
cu un sistema di seguridad ultra moderno, y ofreciendo
lugarnan amplio pa parkeer, e tienda ta habri pa ricibi
cliente tur dia entre 9:00am pa 6:00pm.
Aruba su di dos iStore, Apple Authorized Reseller/Apple
Authorized Service Provider, ta situa na Caya Betico
Croes 49. E Gran Apertura riba diasabra a conta cu e
musica fantastico di Grupo Di Betico.
Palabranan di pabien ta bay na famia Croes riba e
realizacion di nan soñonan!
