Page 16 - AWEMAINTA

16 AWEMainta Diabierna, 27 Juli 2018

Marriott tabata anfitrion di un charla riba comunidad LGBT

DEMOSTRANDO e importancia di personanan
LGBT (Lesbian, Gay, Bi-Sexual y Transgender), Aruba
Marriott Resort a organisa un atardi hopi ameno unda cu
informacion importante a wordo duna na invitadonan. E
evento aki tabata yama LGBT Culture Day, cu ta e prome
cu e cadena hotelero aki ta organisa den e region aki.

Stacy Banfield, marketing communications manager, a
splica di e motibo di e evento aki y a bisa cu a parti e dia
den dos parti unda cu den oranna di mainta tabatin un
sesion cu informacion specialmente pa su asociadonan
mientras cu den oranan di atardi esaki tabata dirigi riba
nan invitadonan, unda prensa tambe a wordo invita.
Pa e evento special aki a trece Director di “Multicultural
Affairs” di Marriott International Seema Jain mientras cu
como orador local tabata Endy Croes, unda a enfoca con
pa comunica di forma efectivo entre e diferente culturanan
y naturalmente cu enfoke special riba comunidad LGBT.
Importante den e dia di informacion aki ta e miembronan
di comunidad LGBT no kier un trato special, pero
simplemente nan kier wordo trata mescos cu cualkier
otro ciudadano comun y coriente.

E iniciativa aki sigur ta alinea cu nan core valuesnan
di “We put people first”, como tambe ‘Serving our
community”. Aruba Marriott ta kere cu ta sumamente
importante pa celebra inclusion y diversidad. A invita
clientenan local pa atende e presentacion aki. A base
di e cantidad di personanan cu a presenta, ta considera
pa haci mas sesionnan similar den futuro, Marriott su
ehecutivo a bisa.