Page 44 - MIN ARENDS

1

Comparti

Gabinete Mike Eman a crea un sala di exposicion, mescos cu den e prome Gobernacion Mike Eman, den
cual ta keda exponi tur e trabounan cu a wordo haci caba y tambe esnan cu ta den pipeline pa wordo
ehecuta den e proximo gobernacion.
Proyecto y trabounan cu a wordo ehecuta, ta bay wordo ehecuta y cu ta den planning ta hopi y tin bes no
ta facil pa publico en general mira esaki den un luga. Gabinete Mike Eman tin un sala di exposicion cu ta
haci net esaki.
Den cuadro di esaki a tene un conferencia di prensa na Expo Hall na Playa, cu ta situa den
Columbusstraat, net na e skina drentando e caya aki patras di Plaza Niki. E persona encarga cu e
exposicion di e proyectonan ta Lara Kuiperi, kende a splica cu Gabinete Mike Eman a dicidi di haci e
exposicion pa di e forma aki expone di tal forma cu publico en general tin acceso na tur e proyectonan di
Gabinete Mike Eman I y II. E exposicion ta encera e trabounan haci durante e dos Gobiernonan lidera pa
Mike Eman y esnan cu nan ta bay wordo realisa den e siguiente gobernacion. “Nos kier a invita publico
en general, principalmente nos hobennan, pa bishita Expo-Futuro y duna nan comentario y pensamento
di tur e proyectonan.”
E exposicion ta wordo inaugura oficialmente dia prome di augustus awor. Ademas di ilustracion
fotografico, e ta contene tambe material audio-visual, manera esnan di Aruba Orguyoso. Pues henter e
vision di e lider Mike Eman pa e cambio cu e kier realisa pa Aruba. “Tur esey bo por mira unabes bo
drenta e sala di exposicion aki,” Kuiperi a bisa.
Tur loke ta aparece den e sala di exposicion tambe ta accesibel via e website: www.boaruba.aw y esaki
ta un forma pa comunidad tambe por participa den desaroyo di e pais, incluso dunando su pensamento
di loke e kier mira, Prome Minister Mike Eman a bisa. El a splica cu e idea ta pa tin dos sala fiho di
exposicion unda publico por yega. E prome sala ta esun den Columbusstraat y e di dos probablemente lo
ta den Nicolaas Store na San Nicolas. Eman a bisa cu e salanan di exposicion ta un forma pa pueblo en
general mira e desaroyo cu Aruba a pasa aden y loke cu tin pa wordo realisa ainda. Pa esnan cu no por
yega na e salanan di exposicion, a lansa e website www.boaruba.aw cu tin tur proyecto tanto den video
como material cu hobennan por uza pa traha werkstuknan pa scol. Pero tambe hopi informacion di tur
loke a wordo haci riba energia renobabel, e tiponan cu tin na Aruba y kico ta e plannan pa futuro.
Minister Sevinger di su banda a splica cu riba e website, un persona cu ta busca informacion ta
simplemente skirbi e nomber y tur detaye cu tin di haber cu e proyecto ta aparece riba pantaya. E website
ta contene e Masterplan total di loke ta renobacion di Pais Aruba.