Page 25 - CMB

E perspectiva economico ta cautelosamente optimista, cu 52% di e encuestadonan
anticipando un crecemento economico den e proximo 12 luna. Sinembargo, 25% di e
encuestadonan ta di opinion cu e actividadnan economico lo keda tranca. Companianan ta
indica cu tin cierto factornan cu ta afecta comercio na Aruba. Esaki ta inclui
administracion gubernamental, gastonan di negoshi y financiamento, y regulacionnan
fiscal y laboral.

Mas cu 80% di e respondentenan ta mira e administracion gubernamental como e reto
mas grandi, y e mesun cantidad ta haya cu e haltura di belasting ta limita nan
inversionnan. Menos di 20% ta experencia e maneho di finansa publico y e proceduranan
duanero relaciona cu importacion y exportacion di bienes como eficiente. Solamente 3
den cada 10 compania ta mira acceso na capital y cuminsando un negoshi como facil.
Asina por conclui cu mayoria di nos empresanan na Aruba ta enfrenta retonan financiero
ora nan purba mehora nan eficiencia y expande nan negoshi.

Durante e tayer di innovacion, e reto y cambionan necesario pa mehora innovacion social
tabata e topiconan mas debati. Fuera di tecnologia, a enfoca riba e necesidad pa
confiansa, transparencia y persistencia pa asina transforma Aruba su economia na un
manera sostenibel y inclusivo. BCA ta gradici tur participante pa nan contribucion
valioso. Na comienso di otro aña, lo bay organisa mas tayer di innovacion pa diferente
stakeholdernan y a base di e contribucionnan ricibi, lo crea un vision pa cu futuro
innovacion, con por logra esaki.