Page 22 - AM210703

22 AWEMainta Diasabra, 3 Juli 2021

UN SNECHI DI PALABRA DI DIOS

XIV DIADOMINGO DEN AÑA 4 di juli 2021 Nr. 318
I lect: Ez 2, 2-5
Salmo: 123
II lect: 2 Cor 12, 7-10
Evangelio: Mc 6,1-6

Den e tempo aya, Hesus a bay su mes pueblo bek. Su discipelnan a compañE. Ora a bira
diasabra, El a bay duna siñansa den snoa y hopi di e hendenan cu tabata scuch’E, a puntra
asombra: “Di unda El a sali cu tur e cosnan aki? Ki mish’E cu tanto sabiduria asina y cu
poder pa haci milager? No ta Hesus, e carpinte, yiu di Maria y ruman homber di Hakobo,
Hose, Hudas y Simon esey? No ta cerca nos aki su ruman muhenan tambe ta biba?” Nan
a sinti nan mes ofendi door di djE. El a declara: “Ta honra un profeta tur caminda, menos
den su mes ciudad, cerca su mes hendenan y den su mes cas”. P’esey, Hesus no por a
haci niun milager eynan; riba un par di hende malo so El a pone man y cura nan. Nan falta
di confiansa a strañ’E. Hesus a haci un recorido cerca e pueblonan den bisindario y tabata
siña e hendenan.

Palabra di Señor.

MENSAHE
Hesus ta yega Nazareth, e pueblo caminda el a lanta como mucha. Aki tur hende ta conoce hopi bon. Por a spera cu
E lo haya bon acogida, pero a bira lo contrario. Su propio pueblo a cuminsa balot’E a base di su pasado y procedencia
familiar.
Pa nan, Hesus tabata djis yiu di un simpel carpinte.
Hopi biaha nos ta haci mescos.
Muchanan no ta duna respet na nan mayornan, simplemente pasobra nan conoce nan mucho bon. Ta husga nan a base
di nan defectonan y ta lubida tur bon cu nan a haci pa nan mes.
Di otro banda, hopi mucha y hoben cu p.e. ta bay studia afo, no ta haya aprecio den nos pueblo ora nan bin bek, pasobra
nan ta keda balota pa nan pasado y nan procedencia familiar. Hende ta descuida cu mucha a studia y a bira diferente.

Pero evangelio di awe ta transmiti un mensahe mas.

- Hende cercano di Hesus, esnan di su famia, esnan cu a conoc’E bon ta rechasa Hesus.

Tin hende cu ta pretende di conoce Hesus. Hende hopi activo den Iglesia. Hende cu tin confiansa cu Hesus y precisa-
mente e confiansa y cercania aki ta haci nan trata Hesus poco serio.

E actitud aki di poco seriedad, falta di fe, falta di respet, falta di oracion ta stroba Hesus di haci milager. Den realidad cada
pica, cada impuresa, actonan di indiferencia, falta di amor of maldad ta stroba Hesus pa actua den nos bida.

Dios libra nos di e actitud asina.

Pa motibo di falta di fe y rechaso na Nazareth, Hesus a bay cerca pueblonan den bisindario.

Si nos no ta duna credito na Hesus, E lo actua cerca esnan cu ta ker’E y sa aprecia su
amor y poder.

ORACION

Señor! Aumenta nos fe!

PROPOSITO
1. Mustra mas aprecio na nos propio hende di famia.
2. Trata Hesus y su doctrina cu mas fe y seriedad.