Page 21 - FDLP

Atleta di Aruba Mikel Schreuders ta

gana medaya na CAC 2018 Baranquilla

Posted on 07/22/2018 2:55 pm AST | Updated on 07/22/2018 2:57 pm AST

BARANQUILLA - E atleta aquatico di Aruba Mikel Schreuders a marca historia logrando un
medaya di Plata pa Aruba den e Weganan Centro Americano y del Caribe Barranquilla 2018.
Asina e portal di deporte di Aruba 297 Sports ta raporta. Cu su tempo marca di 49.17, Mikel
Schreuders ta clasifica automaticamente cu tempo A pa e Weganan Panamericano Lima Peru
2019. Es mas Mikel ta bira e prome landado di Aruba cu ta gana un medaya pa e deporte
landamento. Nunca antes un atleta di landamento a gana un medaya den e Weganan CAC.
Cuater aña pasa na Veracruz, Allyson Ponson tabata asina serca pero ta finalisa na un di 4 lugar
den e 100m estilo liber. Na banda di esaki, Mikel ta kibra e record nacional den 100m estilo
liber.

E mainta na Barranquilla, Mikel ta landa 49.80 cual tabata e di 4 miho tempo, sinembargo anochi
den e final, e hoben Arubano studiando na Merca ta remata duro den e ultimo meternan pa asina
finalisa na un di dos lugar bon pa e medaya di Plata.

Mas cu claro e delegacion completo tabata super contento y orguyoso di e prestacion unico aki.
E medaya aki ta uno cu Mikel a traha duro pe. Dos siman atras tambe e la logra medaya di Plata
den e CCCAN 2018 teni na Aruba mes. Medaya di Oro na Barranquilla a bay pa e Dyllan Carter
di Trinidad & Tobago.

Texto y foto cortesia 297 Sports Aruba