Page 30 - MIN TTC

28 AWEMainta Dialuna, 14 Maart 2016

Aportando na e evento di “Aruba Doet”

Aruba Bank trahando na
“Duinen” den Parke Arikok

Tambe a traha baki di mata y reki di buki na Colegio Pastoor
Kraanwinkel na Paradera

DESPUES cu aña pasa empleadonan di Aruba Bank a traha

pa haci un cambio na Willem III Toren (Fort Zoutman) y na
e forno di calki den Rancho, e aña aki a toca turno na haci
un accion di limpiesa na “duinen” situa den Parke Nacional
Arikok y trabounan adicional di embeyecemento na Colegio
Pastoor Kraanwinkel situa na Paradera.

Diasabra ultimo Aruba Bank a presenta cu riba 30 empleado
na e beach di “Moro” of tambe yama Boca Keto. Ultimo
tempo e area aki a bira masha popular, specialmente pa
“offroad”. Lamentablemente e tipo di actividadnan asina
riba beach ta causa daño na e santo blanco y ta un menasa
pa driekielnan cu ta bin pone webo eynan.

E empleadonan dinamico di e banco cu ta carga nomber
di nos isla, a pone man na obra, a lastra “driftwood” pa
forma baricadanan natural den un esfuerso pa cera e area
pa trafico di motor pa por conserva e santo, e bunitesa di
e area, su trankilidad y di e bestianan cu ta frecuenta na
e beach.

E otro proyecto cu a aporta na dj’e tabata pa traha bakinan
di mata y rekinan di buki cu ‘pallets’ pa henter Colegio
Pastoor Kraanwinkel.
Bakinan di mata rond scol ta trece un ambiente dushi den
pauze pa e muchanan y alabes ta conscientisa e muchanan
pa stima naturalesa pa motibo cu nos no por biba sin dj’e.
Rekinan di buki den tur klas y 3 reki pa gang di scol lo haci
cu e bukinan lo ta mas bisto y atractivo pa e muchanan y di
mes lo stimula lesamento bou di nos muchanan den klas y
den pauze pa alumnonan cu tin gana di lesa buki den pauze.

Di e forma aki Aruba Bank ta demostra, hunto cu su
empleadonan, cu nan ta hopi mas cu djis un banco. Cu nan
ta un bon ciudadano corporativo y cu manera nan lema ta
bisa: “Aruba ta mi isla y Aruba Bank ta mi banco”.