Page 15 - AM210327
P. 15
Diasabra, 27 Maart 2021 AWEMainta 15
Polemica ta sigui entre Aruba
Ocean Villas y opositornan...
PA hopi tempo caba Osyth Henriquez, doño di Aruba
Ocean Villas, ta purbando di sigui dilanti cu su proyecto di
construccion na Savaneta pa medio di base legal. E problema
pa hopi hende ta cu e proyecto aki ta concerni construccion
den lama, unda por stroba e.o matanan di mangel y medio
ambiente den area.
Di banda di Aruba Ocean Villas, ta argumenta cu semper
medio ambiente ta un prioridad y no lo hiba esaki den peliger.
Ademas nan a limpi y cuida e area y a trece expertonan cu a
indica con e matanan di mangel, por lo menos esnan cu no a
haya daño di oil spill, enberdad a crece..
Locual Osyth Henriquez a demostra cu potretnan. Di otro
banda, fundacion Commandeurs Baai ta hopi disgusta c’e
proyecto andando y e situacion. Den un entrevista nan a
conta cu desde 2016 nan ta raportando e hechonan, sperando
cu departamentonan concerni lo tuma accion, pero cu
ainda ningun paso a wordo tuma. Asina Jerry Schwengle di
Commandeurs Baai a splica.
E ta conta cu e fundacion a hasta manda carta pa Prome
Minister encuanto e proyecto aki cu te ainda ta andando, door
cu na final di dia e tereno unda e construccion ta pasando
ta un area protehi pa ley. Asina mes trabou ta sigui, segun
Schwengle...
Tambe tin basta habitantenan malcontento di Savaneta
protestando encontra di Osyth Henriquez, cu ta cuestiona e
proyecto aki den lama. Encontra di esaki, Osyth ta afirma
cu tin ‘cierto informacion’ cu ta sacando e proyecto fuera di
contexto.
Jonathan Viera, yiu homber di Osyth Henriquez, tambe
tabatin algun cos di bisa tocante e situacion fastioso aki. El a
splica cu nan (AOV) ta trahando duro pa Savaneta y henter
Aruba. Nan a hasta invita un grupo encontra di e proyecto
pa papia cu nan y a reacciona riba e ponencianan di e grupo.
Jonathan a menciona cu tin hende cu ta acercanan dor di a lesa
articulonan online relaciona n’e proyecto y cu supuestamente
ta opera contra reglamento - cu otro palabra pa bin critica
nan - pero segun e, pa ultimo e personanan aki mes ta bay
fo’i e encuentro apoyando nan. Cu otro palabra tin fayo di
comunicacion entre otro.
E grupo cu nan a invita ultimo pa papia, Jonathan kiermen cu
ta pa ‘haci show’ nan a bin y pa desacredita AOV y nan trabou.
Asina e polemica ta sigui entre AOV y varios grupo di hende
disgusta cu nan, aunke e raport cu nan a haci supuestamente,
pa medio di expertonan acredita, ta demostra cu nan no ta
haciendo ningun daño.
