Page 2 - AM211030

2 AWEMainta .com
Perde tempo cu investigacion ridiculo
Cualkier politico cu ta asumi responsabilidad
publico no por tin nada secreto
Oficialnan di Seguridad Nacional lo no tin mucho
cos di haci, sigur ora cu nan ta wordo yama pa
“investiga” un leak cu a tuma lugar, ora c’un medio
di comunicacion a publica e informacion cu Ady
Thijssen a wordo nombra dor di Gabinete Wever
Croes, como representante na Brussel.
Parlamentario Setty Yarzagaray durante reunion
publico diahuebs ultimo, a pidi aclaracion na Prome
Minister Evelyn Wever Croes, ta con bin cu nan mes
cu ta di Parlamento no ta na altura di e decision cu ta
regarda Thijssen, ta bin lesa di esaki den un medio di
comunicacion prome cu nan sa di esaki.
Hasta a sugeri cu e propio sr. Ady Thijssen no tabata
na altura ainda di e decision di Conseho di Minister
y pa colmo Prome Minister a informa cu a laga inicia
un investigacion pa sa con esaki por a leak pa prensa
asina rapido.
Na prome lugar tin cu mustra cu Parlamentario di
MEP, Setty Yarzagaray por ta sorpendi cu e noticia
aki ta den prensa asina rapido, pero den Parlamento
e pregunta aki ta di mas ya cu e preocupacion aki ta
mas grandi cu den seno di partido MEP esaki no a
wordo participa.
Sinembargo aki tambe tin cu señala cu tur politico,
cu sea ta den Gobierno of ta den Parlamento, nan ta
hendenan cu a asumi un rol publico, caminda nan
tin cu percura pa gobernacion di e pais, cu pueblo ta
wordo beneficia p’e maneho cu ta wordo hiba.
Nan tur tin un funcion publico y ora cu esaki t’e caso,
no tin ningun informacion sigur ora cu ta trata di un
nombramento publico asina a wordo tuma.
Si partido MEP kier tene su asuntonan di partido
secreto ta algo otro, pero na tur momento c’un
nombramento publico tuma lugar, pueblo tin derecho
di ta na altura “mesora” di esaki y pa pretende cu ta
asunto secreto, ta mescos cu sugeri cu decisionnan di
Conseho di Minister mester ta secreto pa pueblo.
No ta for di awor e nombramento di Ady Thijssen ta
un punto di discusion, un punto di rumornan, ya cu ta
un secreto publico cu e ex Presidente di Parlamento
no ta contento cu e no a bira Minister of no a bira
Minister Plenipotenciario na Den Haag.
Diasabra, 30 October 2021
E situacion cu Thijssen tabata un asunto hopi
delicado pa partido MEP ya cu den un Gobierno
c’un minimo di mayoria, lo ta bou di hopi presion
y tambe ta conoci pa tur hende, kisas no pa esnan
di MEP, cu Parlamentario Thijssen tabata sinta
“rustig” di dje pa mira kico ta bay pasa.
Aki tin cu menciona si cu nunca, pero nunca Ady
Thijssen a lansa un menasa publicamente contra
su Gobierno, pero tabata un hecho cu e ta hopi
disgusta, mientras cu ainda tin mas hende disgusta
den fraccion di MEP den Parlamento.
Awor ta dicidi di haci un investigacion pa mira con
24Ora tin e decision di Conseho di Minister asina
rapido, ta algo totalmente for di sla ya cu tin otro
investigacionnan cu pueblo ta ansioso pa mira
tuma lugar, pero cu ta wordo wanta atras ya cu e
no ta cumbini Gobierno of partido MEP.
Ya caba pueblo a wordo informa cu no por divulga
e raport di screening di Ministernan di Gabinete
Wever Croes II, ya cu segun Prome Minister
esakinan ta secreto, pero nan tur ta trahando p’e
mesun pueblo cu nan ta retene informacion cu
pueblo kier mira y scucha.
E pregunta di Parlamentario Setty Yarzagaray ta
confirma cu gabinete Wever II mescos cu esun
prome, no ta eherce loke nan mes a priminti pueblo
di haci, esta di hiba un gobernacion transparente
den bista di pueblo.
Mesun cos cu loke Yarzagaray a cuestiona ora cu
a nombra un Hefe di Polis nobo, cuestionando di
con prensa ta dispone di e decisionnan aki asina
rapido, pero Hefe di Polis tambe ta un funcion
publico y ta trabou di prensa mas cu tur cos, di
duna informacion na pueblo y den esey no por tin
algo cu por ta un acto criminal.